Búgin Almaty qalasynda III Halyqaralyq «TYRKI DYNIYESI» stýdenttik teatrlarynyń festıvali bastaldy. Atalmysh óner baıqaýyn QR Mádenıet jáne aqparat mınıstrliginiń qoldaýymen, TÚRKSOI uıymynyń bastamasymen, Temirbek Júrgenov atyndaǵy Qazaq ulttyq óner akademıasy uıymdastyryp otyr. Baıqaý mamyrdyń 20-22 aralyǵynda ótedi. Festıválǵa Ázirbaıjan, Qazaqstan, Qyrǵyzstan, Ózbekstan, Túrkıa jáne Túrkimenstan elderinen kelgen 100-ge jýyq ónerpaz qatysady.
Festıvál aıasynda túrkitildes elderdiń stýdentteri teatr qoıylymdaryn sahnalaıdy. Sondaı-aq sheteldik jáne otandyq teatr qaıratkerleriniń sheberlik sabaqtary, shyǵarmashylyq kezdesýler men tájirıbe almasýǵa baǵyttalǵan talqylaýlar ótedi. Buǵan qosa, zamanaýı dramatýrgıany damytýǵa úles qosatyn jańa pesalardyń oqylymy uıymdastyrylady.
Festıválmen qatar, TÚRKSOI uıymyna múshe elderdiń shyǵarmashylyq joǵary oqý oryndary qaýymdastyǵynyń kezekti otyrysy ótedi. Bul kezdesýde teatrlyq bilim berýdiń zamanaýı máseleleri, oqytý ádistemelerin jetildirý, oqý oryndary arasyndaǵy kásibı yntymaqtastyq pen mádenı almasýdy arttyrý jaıy talqylanady.
Akademıa rektory Arman Júdebaev bul sharanyń mańyzyn erekshe atap ótti:
2023 jyly halyqaralyq TÚRKSOI uıymynyń sheshimimen stýdenttik teatr festıvalin turaqty túrde ótkizý týraly kelisim jasaldy. Alǵashqy festıvál Ózbekstanda ótti, ekinshi ret Ázirbaıjanda uıymdastyryldy, al úshinshi festıvál bıyl túrki áleminiń mádenı astanasy Almaty qalasynda ótkizilip jatyr.
Festıváldiń negizgi maqsaty – túrki elderinen kelgen stýdentter arasynda mádenı jáne shyǵarmashylyq dıalog ornatý. Ár memlekettiń ózine tán dástúri, sahna tili men rejıserlik baǵyty bar. Bul shara sol ereksheliktermen tanysyp, tájirıbe almasýǵa múmkindik beredi. Festıvál – jas ónerpazdar úshin úlken sahnaǵa qadam basýǵa, kásibı baǵyt-baǵdar alýǵa jáne halyqaralyq deńgeıde óz talanttaryn kórsetýge tamasha múmkindik.
Bizdiń basty mısıamyz – túrki elderi arasyndaǵy dostyq pen yntymaqtastyqty nyǵaıtý, ári stýdentterdiń shyǵarmashylyq damýyna praktıkalyq qoldaý kórsetý.
Festıvál – bul tek shyǵarmashylyq baıqaý ǵana emes, túrki halyqtarynyń ortaq mádenıetin dáripteıtin, jas býyn ónerpazdardy bir maqsatqa toǵystyratyn mańyzdy platforma. Teatr arqyly bir-birin túsinip, ózara baılanys ornatqan jastar bolashaqta túrki áleminiń mádenı kópirine aınalary sózsiz. «TYRKI DYNIYESI» festıvali sol mádenıetter úndestigin, óner arqyly dostyq pen yntymaqtastyqty nyǵaıtýdyń jarqyn úlgisine aınalyp keledi.
