Sońǵy ýaqytta áleýmettik jeliler men túrli habarlandyrý saıttarynda zeınetaqy jınaǵyn «tómen paıyzben shyǵaryp beremiz» dep ýáde beretin deldaldar kóbeıip jatyr. Olar adamdarǵa jetkiliktilik sheginen asqan jınaqty alýǵa kómektesemiz dep jarnama taratyp, bul qyzmetti kez kelgen adam paıdalana alady dep sendiredi.
Sondaı-aq, olar "jaqynda ereje ózgeredi" degen syltaýmen jalǵan aqparat taratyp, ózderin senimdi etip kórsetý úshin BJZQ men ýákiletti operatorlardyń logotıpterin zańsyz qoldanady.
Osyǵan baılanysty "Biryńǵaı jınaqtaýshy zeınetaqy qory" (BJZQ) resmı málimdeme jasap, barsha salymshylardy abaı bolýǵa shaqyrdy.
BJZQ eskertedi:
-
Qor qyzmetkerleri sizge telefon arqyly habarlaspaıdy;
-
JSN, jeke kýálik nómiri, bank kartasy derekteri, SMS-kod nemese qupıasóz suramaıdy;
-
"Qarajatyńyz buǵattaldy" degen mazmundaǵy qońyraýlar shyndyqqa janaspaıdy;
-
Barlyq resmı aqparat tek BJZQ-nyń www.enpf.kz saıtynda jáne jeke kabınette ǵana jarıalanady.
Ózińizdi qalaı qorǵaısyz?
-
Beıtanys adamdarǵa jeke málimetterińizdi bermeńiz – ásirese olar ózderin BJZQ nemese basqa memlekettik mekeme qyzmetkeri dep tanystyrsa;
-
Kúmán týyndasa, aqparatty BJZQ-nyń resmı saıtynan nemese 1418 nómiri arqyly tekserińiz;
-
Alaıaqtyq kúdigi bolsa, birden toqtap, quqyq qorǵaý organdaryna habarlasyńyz.
