«Alǵa, Qazaqstan» opozısıalyq partıasynyń jetekshisi, tanymal marafonshy Marat Jylanbaev qazir túrmede jeke zattarynan aıyrylyp, edende uıyqtaýǵa májbúr. 

14 mamyrda Jylanbaev otbasyna qońyraý shalyp, túrme qyzmetkeri tósek jaımasyn, oramalyn, saǵatyn, dári-dármegin jáne kúntizbesin alyp ketkenin, ári esh túsinikteme berilmegenin jetkizgen.

– Ádette Marat sársenbi saıyn habarlasady. Bul joly da habarlasty, biraq erekshe qobaljyp turdy. Ol óziniń tártiptik ızolátorda otyrǵanyn jáne bul áreketterdiń moraldyq qysym ekenin aıtty, – dedi áıeli.

Jylanbaev sáýir aıynda ashtyq jarıalap, ony 40 kúnnen keıin, 4 mamyrda, densaýlyǵyna baılanysty toqtatqan. Jubaıynyń aıtýynsha, aǵzasy qatty álsirep, dıareıa bolyp, dárigerler oǵan tek Lıneks pen Festal bergen.

Sondaı-aq, eki aıdan beri oǵan gazet-jýrnaldar berilmeıdi, hat almasýǵa da múmkindik joq. Áıeliniń aıtýynsha, Jylanbaev quqyq qorǵaýshylardan endi gazet jibermeýdi suraǵan.

– Ol jaımalary alynǵan soń edende jatýǵa májbúr. Maǵan: «Kelesi sársenbide habarlaspasam, basyma birdeńe boldy dep bilińder», – dedi. Ne isterimdi bilmeı otyrmyn, – deıdi jubaıy.

Azattyq Stepnogorsk qalasyndaǵy №4 túzeý mekemesiniń basshysy Qanat Tulaqovqa birneshe ret habarlasqanymen, jaýap ala almaǵan. Qylmystyq atqarý júıesi komıtetine resmı suraý jiberilgenimen, jaýap áli kelmegen.

2023 jylǵy qarashada Astana qalalyq soty Marat Jylanbaevty «ekstremıstik uıym isine aralasty» jáne «ekstremızmdi qarjylandyrdy» degen aıyppen 7 jylǵa bas bostandyǵynan aıyrǵan. Ol bul aıyptaýlardy joqqa shyǵaryp, istiń saıası astary bar ekenin aıtqan. Qazaqstandyq quqyq qorǵaýshylar ony saıası tutqyn dep tanydy.

Al resmı bılik elde saıası tutqyn joq, eshkim pikirine bola qýdalanbaıdy degen ustanymda.
Alaıda, halyqaralyq uıymdar Qazaqstandy Marat Jylanbaevty bosatýǵa úndep keledi. Jaqynda International Partnership for Human Rights uıymy oǵan taǵylǵan aıyptardy beıbit opozısıalyq qyzmeti úshin jazalaý dep baǵalady.