Jeli qoldanýshylary boıkotty kompanıa qazaqsha sóıleýdi talap etken kýrerdi jumystan shyǵarǵan soń jarıalady.

Qazaqstandaǵy Magnum saýda jelisi qazaqstandyqtar áleýmettik jelide jappaı boıkot jarıalaǵannan keıin kýrerdi jumystan shyǵarýǵa qatysty túsinikteme berdi. 

Eske salaıyq, áleýmettik jeli qoldanýshylarynyń biri Magnum saýda jelisinen úıine azyq-túlikke tapsyrys berip, ony ákelgen kýrerdiń ózinen óz úıinde qazaqsha sóıleýdi talap etkenin jazǵan edi. Kýrerdiń qazaq tilinde "Atyń kim?" dep qoıǵan suraǵyna ol oryssha jaýap bergen. Buǵan ashýlanǵan kýrer "Qazaqsha sóıle" degen. Osy oqıǵaǵa baılanysty jeli qoldanýshysy Magnum saýda jelisine shaǵymdanyp, keıin kompanıa kýrerdi jumystan shyǵarǵanyn habarlaǵan edi. 

Bul oqıǵa áleýmettik jelide qyzý talqylanyp, pikirler ekige jaryldy. Qazaqsha sóıleýdi talap etken kýrerdi jaqtaǵan top jelide Magnum saýda jelisinen qarsy boıkot jarıalady. 

Osyǵan oraı, kompanıa Instagram jelisinde oqıǵaǵa qatysty túsinikteme berip, kýrerdiń jumystan ne úshin shyǵarylǵanyn túsindirdi. 

"Kýrerdiń jumystan bosatylý sebebi – klıenttermen bir emes, eki emes, birneshe dúrkin dóreki sóılesip, qyzmet kórsetý ádebin qaıtalap buzýy. Biz oǵan óz qateligin túzetýge jetkilikti ýaqyt berdik – eskertý jasadyq, synaq merzimine aýystyrdyq. Alaıda, ókinishke qaraı, sol ýaqyt ishinde de ádebi ózgermeı, taǵy da tutynýshymen arazdasyp qaldy. Keleńsiz oqıǵalar qaıtalandy. Artynan shaǵym túsip jatty. Sodan keıin, amal joq, eńbek shartyn buzýǵa týra keldi. Kýrerdiń jumystan ketýine til emes, minez-qulqy sebep boldy – muny naqty aıtyp ótkimiz keledi", – delingen kompanıanyń jazbasynda.