Astana polısıa departamenti áıelin urdy dep aıyptalǵan burynǵy dıplomat Sáken Mamashqa qatysty qylmystyq is boıynsha tergeýdiń egjeı-tegjeılerin aıtty.
Vedomstvonyń baspasóz qyzmeti redaksıa saýalyna bergen jaýabynda, byltyr quqyq qorǵaý organdary Qazaqstannyń elshiligindegi burynǵy keńesshige qatysty jubaıyna júıeli túrde qol jumsaý deregi boıynsha qylmystyq is qozǵaǵanyn eske saldy.
"Polısıa tarapynan jedel-tergeý toby qurylyp, oqıǵanyń barlyq mán-jaıyn anyqtaý úshin qajetti saraptamalar júrgizildi. Aıtarlyqtaı dáleldemeler jınalyp, bekitildi", – delingen departament habarlamasynda.
Tergeý nátıjesi boıynsha tergeý soty kúdiktige qatysty "qamaýǵa alý" túrindegi bultartpaý sharasyn tańdaǵan.
Eske salsaq, "NeMolchı.kz" qorynyń paraqshasynda BAÁ-degi elshiliktiń keńesshisi Sáken Mamash áıelin turaqty túrde uryp-soǵatyny týraly aqparat paıda boldy. Qazaqstan Syrtqy ister mınıstrligi dıplomat shuǵyl túrde elge shaqyrylatynyn aıtyp jaýap berdi. Keıin zorlyq-zombylyq týraly habarlaǵan elshilik qyzmetkeriniń jubaıy da BAÁ-den qaıtarylatyny belgili boldy. Bul rette ony áýejaıda kúıeýiniń týystary qarsy alǵany aıtyldy.
2024 jylǵy 28 maýsymda Astana qalasynyń ákimshilik quqyq buzýshylyq ister jónindegi mamandandyrylǵan aýdanaralyq soty Sáken Mamashqa qatysty densaýlyqqa qasaqana jeńil zıan keltirý deregi boıynsha isti qarady. Sot sheshimi boıynsha, ol kináli dep tanylyp, 15 táýlikke ákimshilik qamaqqa alyndy.
