Búgin Májiliste Konstıtýsıanyń 30 jyldyǵyna oraı raqymshylyq jarıalaýdy kózdeıtin zań jobasy qaraldy. Qujattyń ekinshi babyna sáıkes, eger qylmys adamǵa zıan keltirmese nemese keltirilgen zalal tolyq ótelse, ortasha aýyrlyqtaǵy qylmys jasaǵandarǵa raqymshylyq qoldaný qarastyrylǵan. Sonymen qatar, aýyr jáne asa aýyr qylmystar boıynsha jaza merzimin qysqartý múmkindigi de bar.

Talqylaý barysynda Májilis depýtaty Ermurat Bapı sybaılas jemqorlyqqa qatysty raqymshylyq máselesin naqtylaýdy surady.

– Bizde jemqorlyq degen bir dert bar. Olardy raqymshylyqqa jatqyzamyz ba? Sebebi jemqorlyqtyń úlken-kishisi bolmaıdy. Az mólsherdegi nemese tolyq jemqorlyq dep bólýdiń ózi durys emes. Bul qalaı jikteledi? – dedi depýtat.

Oǵan jaýap bergen Májilis depýtaty Abzal Quspan zań jobasynda bul máselege naqty shekteýler qoıylǵanyn atap ótti.

– Zań jobasynyń 4-babynda raqymshylyq qoldanylmaıtyn baptar naqty kórsetilgen. Olardyń qatarynda sybaılas jemqorlyq sıpatyndaǵy barlyq qylmystar bar. Qazirgi tańda bas bostandyǵynan aıyrý oryndarynda osy sanat boıynsha 624 adam jazasyn ótep jatyr. Olardyń eshqaısysyna raqymshylyq qoldanylmaıdy, – dedi ol.