Qazaqstanda eń tómengi kúnkóris deńgeıi keıingi bir aı ishinde 2 paıyzǵa artyp, 54 408 teńgege jetken. Sarapshylar bul qarajat azyq-túlikti aıpaǵanda, komýnaldyq qyzmet pen jolpulǵa jetpeıtinin aıtyp, tutyný sebetin eń tómengi jalaqy deńgeıinde belgileýdi usyndy.

Sońǵy derekterge súıensek, Qazaqstanda bir mıllıonǵa jýyq adamnyń tabysy eń tómengi kúnkóris deńgeıinen de tómen. Atalǵan kórsetkish sáýir aıynda 2%-ǵa ósip, 55 myń teńgege jetti. Alaıda bul somaǵa azyq-túlik, komýnaldyq qyzmet, jolaqy sıaqty negizgi qajettilikterdi jabý múmkin emes.

Turǵyndar qazirgi naryqtaǵy baǵalar jaǵdaıynda 50 myń túgili, 350–400 myń teńgeniń ózi jetkiliksiz ekenin aıtady.

"Ettiń kelisi 3 myń teńgeden bastalady. 50 myń teńge bir kúnge de jetpeıdi", – deıdi olar.

Ekonomıserdiń aıtýynsha, eń tómengi tabys mólsheri keminde ortasha aılyqtyń úshten birine teń bolýy tıis. Sonymen qatar tutyný sebeti qazirgi 50-55 myń emes, kemi 130 myń teńgege eseptelýi kerek.

"Bir adamǵa 85 myń teńge jalaqy belgileımiz de, shyǵyndy 50 myńmen josparlaımyz – bul qısynsyz. Árıne, kúnkóris shegin kóterý búdjetke salmaq túsiredi, biraq ol azamattardyń qajettiligin qamtamasyz etýge jol ashady", – deıdi ekonomıs Baýyrjan Ysqaqov.

Onyń aıtýynsha, qazirgi tutyný sebeti halyqaralyq standarttarǵa saı emes. Sebettegi taýarlar men qyzmet túrleriniń sany tym az, bul óz kezeginde kúnkóris sheginiń jasandy túrde tómen bolýyna ákelip otyr. Sarapshy sebetti naqty qajettilikterge saı qaıta qaraýdy usyndy.