Sherzat Bolattyń ólimi boıynsha ótip jatqan sot prosesinde aıyptalýshy Darhan Áskentaıdyń advokattary sotqa ótinishhat túsirdi.

Alaıda sot advokat Erjanovtyń ótinishhattaryn ashyq qaldyrdy. Sýdıa aldymen Darhan Áskentaıdan jaýap alynatynyn jetkizdi.

Aıyptalýshy Darhan Áskentaıdyń advokaty tergeý kezinde onyń qysym kórgenin aıtyp, oqıǵa bolǵannan keıin oǵan medısınalyq kómek kórsetken dárigerlerdi sotqa shaqyrýdy ótindi.

Sherzat Bolattyń bet tusyna soqqy jasaǵany týraly derek boıynsha Talǵar aýdandyq aýrýhanasynda Áskentaıǵa medısınalyq tekseris júrgizilgen. Biraq tekseris kezinde qajetti medısınalyq kómek kórsetilmedi, sonyń saldarynan Darhan Áskentaı tergeý kezinde tolyqqandy jaýap bere almady. Sonymen qatar, onyń densaýlyǵy eskerilmeı, barlyq sot tergeýi zańsyz ári qysymmen ótkizildi, - dedi advokat.

Onyń aıtýynsha, 28 kún boıy Áskentaıǵa eshqandaı em kórsetilmegen.

Áskentaı Darhannyń kóziniń astyndaǵy súıegi synyp, kózi irińdep ketken. Onyń densaýlyq jaǵdaıyna baılanysty, Qonaev qalasyndaǵy ýaqytsha ustaý ızolátoryna aýystyrylǵan kezde alǵash bolyp Qonaev aýrýhanasyna jetkizilip, medısınalyq kómek kórsetildi. Osy másele boıynsha ýaqytsha ustaý ızolátorynyń basshysyn kýá retinde sotqa shaqyrýdy suraımyn, – dedi advokat Erjanov.

Sonymen qatar ol jábirlenýshiniń zańdy ókili Nurymov Qarjaýbaıdyń sotta bergen jaýaptarynan keıin Áskentaı Darhannyń Rınat esimdi jezdesin qosymsha kýá retinde jaýap alýǵa, ony sotqa shaqyrýdy ózine júkteýdi ótindi.

Ol sýdıadan jábirlenýshiniń zańdy ókili Nurymov Qarjaýbaıǵa qorǵaý tarapynan qoıylmaǵan birneshe suraq bar ekenin aıtty. Osyǵan baılanysty Nurymov Qarjaýbaıdan qaıta jaýap alýyn surady.