Qasym-Jomart Toqaev qazaqstandyq boksshy Nazym Qyzaıbaıdy tarıhı jeńisimen quttyqtady.

"Nazym Qyzaıbaıdy otandyq boks tarıhynda tuńǵysh ret úsh dúrkin Álem chempıony bolýymen quttyqtaımyn. Bul – aıtýly jetistik! Serbıada ótip jatqan álem birinshiliginde úzdik nátıje kórsetken Ulttyq qurama múshelerine alǵys aıtamyn. Sportshy qyzdarymyz aldaǵy ýaqytta da úlken jeńisterge jete berýine tilektestik bildiremin", – dep jazdy Memleket basshysy Instagram jelisindegi óziniń paraqshasynda.

Nazym Qyzaıbaı Serbıanyń Nısh qalasynda bokstan ótip jatqan álem chempıonatynyń jeńimpazy atandy. Ol 48 keli salmaq dárejesinde baq synady. Nazym Qyzaıbaı fınalda reseılik Iýlıa Chýmgalakovamen judyryqtasty. Úsh raýndtyń qorytyndysy boıynsha qazaqstandyq sportshy qarsylasyn 5:0 esebimen aıqyn basymdyqpen jeńdi.

Nazym Qyzaıbaı qazaq boksy tarıhynda úsh márte álem chempıony atanǵan alǵashqy sportshy atanyp otyr.