Abaı oblysyndaǵy áskerı bólimde 18 jastaǵy Salamat Sábıtov kóz jumdy. Onyń týystarynyń aıtýynsha, sarbaz áskerge densaýlyǵynda aqaýy bola tura alynǵan. Salamat naýryzda Soltústik Qazaqstan oblysynan shaqyrylyp, úsh apta ǵana qyzmet etken. Ant qabyldap ta úlgermegen.

Týystarynyń sózinshe, oǵan omyrtqa men kóz máselelerine baılanysty «áskerge jaramsyz» degen anyqtama berilgen. Soǵan qaramastan, ony tank bólimine jiberip, keıin jaǵdaıy kúrt nasharlap, aýrýhanaǵa túsken. Sarbazdyń ólimine mı qabynýy men menıngıt sebep bolǵany aıtyldy.

"22 sáýirde eki qyzmetker túngi saǵat 22.00-de úıge keldi. Ulymdy áskerı mindetinen jaltaryp júr dep aıyptap, qylmystyq qýdalaý qaýpi tónetinin aıtty. Tipti is áskerı prokýrorǵa beriletinin jetkizdi. Áıtpese bizge tórt mıllıon teńge aıyppul tóleýge týra keletinin alǵa tartty. Al mende ondaı aqsha joq. Ózimiz páter jaldap turamyz. Tańerteń ony sol jerden áskerge alyp ketti. Alaıda bul kezde men jumysta boldym. Ony poıyzda bolǵan kezde ǵana kórdim. Mezgil-mezgil qońyraý shalyp turdyq. Eshteńege shaǵymdanǵan joq. Sodan keıin ulym jansaqtaý bólimine tústi. Komandır bári jaqsy ekenin aıtyp, alańdamaýymdy ótindi. Alaıda biz senbeı týysqanymyzdy jiberdik. Týysymyz Salamattyń komaǵa túskenin habarlady. Sodan men aýrýhanaǵa tańerteń jettim. Sol kúni onyń júregi toqtap qaldy", – dep jylady sarbazdyń anasy.

Salamattyń anasy balasyn áskerge jibermese, aıyppul salynatynyn aıtyp, qorqytqanyn jetkizdi. Qorǵanys mınıstrligi sarbazdyń ólimin rastady. Qazir qylmystyq is qozǵalyp, tekserý júrip jatyr.