Qazaqstannyń Bas prokýrory Qarýly Kúshterde eki jańa jobany engizýdi tapsyrdy.
Qasym-Jomart Toqaevtyń aıtýynsha, áskerı qyzmetshilerdiń ómiri men densaýlyǵyn saqtaý – barlyq deńgeıdegi qolbasshylyq jumysynyń basym baǵyty bolýy tıis. Áskerı qyzmet qaýipsizdik, abyroı, tártip pen ádilet qaǵıdattaryna negizdelýi qajet.
Osy qaǵıdalardy basshylyqqa ala otyryp, Memleket basshysy Bas áskerı prokýratýraǵa Qarýly Kúshtermen, basqa da áskerler men áskerı qurylymdarmen birlesip eki jańa jobany engizýdi tapsyrdy:
- «Áskerdegi zań jáne tártip»,
- «Sıfrlyq profılaktıka».
Maqsat – árbir áskerı qyzmetshi qorǵalǵan, al komandır senim men qoldaýǵa ıe bolatyn júıeni qalyptastyrý. Eń aldymen áskerı bólimderde zamanaýı IT-júıelermen beınebaqylaý ornatylady. Jasandy ıntellekt tehnologıalaryn engizý arqyly jaǵdaıdy avtomatty túrde taldap, jeke quramnyń qaýipsizdik deńgeıin arttyrý kózdelýde. Komandırlerdi (dalalyq jattyǵýlarda, atys kezinde, oqý-jattyǵýlarda) jáne qaraýyldaǵy jáne jaýyngerlik kezekshiliktegimerzimdi qyzmettegi sarbazdardy beınejetondarmen jaraqtandyrý josparlanýda. Bul qyzmetti ótkerý barysynda naqty ári úzdiksiz baqylaý júrgizýge múmkindik beredi, – deıdi Bas prokýror.
Qazirdiń ózinde http://armia.kz saıtynda sıfrlyq keńesshi iske qosyldy. Sonymen qatar jańa baılanys arnalary engizilýde — árbir sarbaz qaıda júginý kerektigin bilip, oǵan nazar aýdarǵanyna senimdi bolýy tıis.
Sondaı-aq, ashyqtyqty qamtamasyz etý maqsatynda áskerı shaqyrý jáne medısınalyq komısıa otyrystaryn aýdıo-beıne tirkeý, hattamalardy sıfrlandyrý jáne olardy shaqyrylýshylardyń ózderine qashyqtan qoljetimdi etý máseleleri pysyqtalýda. Bul — medısınalyq qarsy kórsetilimderi bar azamattardy merzimdi qyzmetke shaqyrýdyń aldyn alady.
Bul jáne ózge de sharalar — áskerı qyzmet atqarý kezinde sarbazdardyń qaýipsizdigin qamtamasyz etýge baǵyttalǵan tıimdi tetikter bola alady.
