Rýslan Jaqsylyqovtyń qamaýǵa alynǵany týraly aqparat shyndyqqa janaspaıdy — eks-mınıstrdiń ózi málimdedi

2025 jylǵy 10 maýsymda áleýmettik jelilerde burynǵy Qorǵanys mınıstri Rýslan Jaqsylyqovtyń qamaýǵa alynǵany jóninde aqparat tarady. Jazbalarda eks-mınıstrdiń Astana qalasyndaǵy ýaqytsha ustaý ızolátorynda otyrǵany týraly aıtylǵan.

"Rýslan Jaqsylyqov Astana qalasyndaǵy ýaqytsha ustaý ızolátorynda otyr. Tergeý amaldaryna baılanysty basqa málimetter jarıa etilmeıdi", – delingen alǵashqy taraǵan habarlamada.

Alaıda atalǵan aqparatty Tengrinews.kz tilshileri naqtylap, Rýslan Jaqsylyqovpen vıdeoqońyraý arqyly tikeleı sóılesken. Eks-mınıstr bul málimettiń jalǵan ekenin málimdedi.

— Bul bos sóz. Birinshiden, tek resmı aqparat kózderine sený kerek. Qazirgi ýaqytta men demalystamyn. Maǵan demalýǵa múmkindik berildi. Sońǵy úsh jarym jylda alǵash ret demalysqa shyǵyp otyrmyn. Ózderińiz bilesizder, bul qyzmet únemi tolyqtaı ýaqytty talap etedi, — dedi Jaqsylyqov.

Onyń aıtýynsha, qazirgi ýaqytta ol Astanadaǵy úıinde, otbasymen birge demalyp jatyr. Tipti balalaryna arnap aýlaǵa batýt ornatyp qoıǵanyn da atap ótti.

Sonymen qatar, Jaqsylyqov jalǵan aqparat taratqandarǵa qatysty quqyq qorǵaý organdaryna júginýge nıetti ekenin bildirdi.

— Ar-namysym men abyroıyma nuqsan keltiretin jalǵan aqparat taratqandardyń ústinen zań aıasynda shara qoldaný úshin quqyq qorǵaý organdaryna júginýge májbúrmin, — dedi ol.