Ol májbúrli emdeýge jiberildi.
2025 jyldyń 23 naýryzynda Aqtóbe oblysy Muǵaljar aýdany Qandyaǵash qalasynda aýyr qylmys tirkeldi. Tórkinine emdelý úshin kelgen 29 jastaǵy kelinshek óz uly men qyzyn tunshyqtyryp óltirdi. Búgin Aqtóbe oblystyq qylmystyq ister jónindegi mamandandyrylǵan aýdanaralyq sotynda oǵan qatysty úkim jarıalandy.
Aıyptalýshy áıelge Qylmystyq kodekstiń 99-babynyń 3-bóligi boıynsha (eki nemese odan da kóp adamdy óltirý) aıyp taǵylǵan. Sotta onyń kúıeýi, ákesi jáne aǵasy kýálik berip, kelinshektiń psıhıkalyq densaýlyǵyndaǵy aýytqýlar týraly aıtyp ótti. Marqum bolǵan balalardyń anasy mektepti, kolejdi jáne eki joǵary oqý ornyn úzdik aıaqtaǵan, sportpen de belsendi aınalysyp, taekvondodan oblys chempıony atanǵan. Turmysqa shyqqannan keıin Atyraý oblysynyń Saǵyz aýylynda turyp, sol jerde eki balany dúnıege ákelgen.
Sotta sóılegen ákesiniń aıtýynsha, qyzy sońǵy kezderi mazasyz kúıde júrgen. “Imam men dárigerge kórsettim, em qabyldaǵan soń biraz tynyshtaldy. Keıin men jumysqa ketkenimde, jaǵdaıyn telefon arqyly baqylap otyrdym. Jaǵdaıynyń nasharlaǵanyn estip, dári ishýin aıttym. Araǵa eki saǵat ótkende ózi qońyraý shalyp, balalaryn tunshyqtyryp óltirgenin aıtty. Endi kimge renjımiz?” — dedi ol sotta.
Sot saraptamasynyń qorytyndysy boıynsha, áıel aýyr psıhıkalyq dertke shaldyqqan: paranoıdty shızofrenıanyń depressıalyq-paranoıdty sındrom túri, sýısıdtik tendensıalary bar. Ol óz is-áreketterin tolyq túsinip, baqylaý qabiletinen aıyrylǵan.
Sot onyń aqyl-esi durys emes kúıde qylmys jasaǵanyn moıyndap, Qylmystyq kodekstiń 99-baby 3-bóligi boıynsha qylmystyq jaýapkershilikten bosatty. Sonymen qatar, Qylmystyq kodekstiń 93-babynyń 1-bóligi 2-tarmaǵyna sáıkes, sottalýshyny jiti baqylaýdaǵy mamandandyrylǵan psıhıatrıalyq stasıonarǵa májbúrli túrde emdeýge jiberý týraly sheshim shyǵardy.
Eske salaıyq, qaıǵyly oqıǵada 2022 jyly týǵan uly men 2024 jyly dúnıege kelgen qyzy qaza tapqan edi.
