Ústimizdegi jyldyń 16 qazany kúni «Almaty» ýnıversıteti Ońtústik astanamyzdyń Panfılov jáne Gogol kósheleriniń qıylysynda ornalasqan jańa ǵımaratynyń ashylý saltanatyn ótkizdi. Jańa ǵımarattyń ashylý saltanatyna ýnıversıtettiń profesor-oqytýshylar quramy men stýdentteri, JOO ókilderi men estrada juldyzdary qatysty. Ashylý saltanatynda sóz sóılegen ýnıversıtet rektory, tarıh ǵylymdarynyń kandıdaty Shildebaı Sábıt Qamytbekuly:

- Búgin bizdiń ýnıversıtet úshin aıtýly kún. Olaı deýimizdiń ózindik sebebi de bar. Bizdiń ýnıversıtetimiz qanatyn keńge jaıyp, taǵy bir jańa ǵımaratpen tolyqty. «Almaty» ýnıversıteti – sońǵy jyldary elimizde júrgizilgen JOO ońtaılandyrý saıasaty negizinde irilenip, zamanaýı ózgerister talabymen ońtústik astanamyzdaǵy jeke menshik oqý oryndarynyń kóshin bastaýǵa umtylǵan bilim ordalarynyń biri bolýdy kózdep otyr. 18 jyldyq tarıhy bar ýnıversıtet óziniń qurylǵan kúninen bastap, qazirgi tańǵa deıin myńdaǵan mamandyq ıesin shyǵarǵan kıeli shańyraq. Bizdiń ýnıversıtetti bitirgen mamandyq ıeleri Respýblıkamyzdyń túkpir-túkpirinde túrli salalarda qyzmet jasap, qoǵam damýyna óz úlesterin qosýda.

Qazirgi tańda, Almaty ýnıversıtetinde 30 bakalavr, 11 magıstratýra, 2 PhD doktorantýra mamandyqtary boıynsha bilim beriledi. Ózindik bilim berý júıesinde, ǵylymı jumystardy uıymdastyrýda tájirıbesi qalyptasyp kele jatqan joǵary oqý orny alys-jaqyn TMD memleketterimen baılanys ornatyp, akademıalyq utqyrlyqpen Koreı Respýblıkasy, Túrkıa, Ýkraına, Reseı, Qytaı, Bolgarıa, Kıpr, Lıtva, Qyzǵyz memleketteri ýnıversıtetterimen tyǵyz qarym-qatynasta. Bunyń bári jas bilim ordasy úshin úlken jetistik ekendigin aıtyp ótkenimiz jón. Jańa ǵımarattyń ashylýymen ýnıversıttiń oqytýshy-professorlar quramyn, sonymen qatar bilimge umtylǵan stýdentterdi quttyqtaımyn, - dep atap ótti.

Rektordyń quttyqtaý sózinen keıin saltanatty túrde jańa oqý ǵımaratynyń lentasy qıyldy. Odan ári konserttik baǵdarlamaǵa jalǵasty. «Almaty» ýnıversıtetiniń ujymyn arnaıy quttyqtaýǵa kelgen Qazaqstannyń eńbek sińirgen mádenıet qaıratkeri Gúlmıra Aqúrpekova men Qazaq memlekettik Qyzdar pedagogıkalyq ýnıversıteti Óner jáne mádenıet fakúltetiniń dekany Gúlnur Ómirbaeva ásem daýystarymen kezek-kezek ánnen shashý shashty. Konserttik baǵdarlama odan saıyn qyza tústi. Ásirese, «Jigitter» kvartetiniń solısi Aıdar Turǵanbek pen estradanyń jarqyn juldyzy Serikbol Saılaýbek sahnaǵa shyqqanda stýdentterdiń qurmet-qoshemeti erekshe boldy. Almaty ýnıversıtetiniń stýdentteri de óz ónerlerin ortaǵa saldy. Ýnıversıtettiń 1 kýrs stýdenti Jangırbaeva Asemaı myń buralyp bılese, 3 kýrs stýdenti Mýratova Altynaı án saldy. Ashylý saltanatyna arnaıy shaqyrtýmen kelgen mentaldy arıfmetıkadan İİ Respýblıkalyq olımpıadanyń absolútti chempıony Baıjaqyp Marǵulan da óz ónerin kórsetti.

Konserttik baǵdarlama aıaqtalǵan soń ýnıversıtet ujymy men stýdentter jańa ǵımarattyń ishin aralap kórdi. Zamanaýı tehnıkalyq qural-jabdyqtarmen jabdyqtalǵan dárisqanalar, zerthanalar, ınteraktıvti jáne mýltımedıalyq kabınetter kópshiliktiń kóńilinen shyqty.