Úlbi metalýrgıalyq zaýyty qoımasynda MAGATE-niń 90 tonna tómen baıytylǵan ýrany saqtalanatyn bolady, - dep habarlaıdy Qamshy.kz QazAqparatqa silteme jasap.

Bul týraly búgin QR Parlamenti Májilisiniń Halyqaralyq ister, qorǵanys jáne qaýipsizdik komıtetiniń keńeıtilgen otyrysynda «QR Úkimeti men Atom energıasy jónindegi halyqaralyq agentik arasyndaǵy Qazaqstan Respýbılkasynda Atom energıasy jónindegi halyqaralyq agenttiktiń Tómen baıytylǵan ýran bankin qurý týraly kelisimdi ratıfıkasıalaý týraly» QR zańynyń jobasyn talqylaý barysynda depýtattardyń saýalyna jaýap bergen elimizdiń Energetıka vıse-mınıstri Baqytjan Jaqsalıev málimdegen.

«Táýelsizdik jyldary ortasha eseppen bizde birneshe jyldyq tapsyrys bolyp tur. Ol ýaqytta biz reseılik kásiporyndar úshin shamamen 300 tonna tabletka óndiretinbiz. Iaǵnı, bir mezette 200 jáne odan kóp tonna saqtalyp otyrdy. Qazirgi ýaqytta shamamen 40 tonna bar», - dedi ol.

Osy rette  QR Parlamenti Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev vıse-mınıstrden atalǵan kólemge qosymsha 90 tonna MAGATE ýranyn saqtaý josparlanyp otyr ma, dep surady.

«Iá, biraq ol jeke qoımada saqtalady. Buǵan qosa, bizge materıaldar qaıta óńdeý úshin únemi jetkizilip turatyn bolady. Taıaý bolashaqta 200 tonnaǵa deıingi kólemdegi materıal bizge qaıta óńdeýge jetkiziledi. Al odan qytaılyq atom elektr stansalary úshin otyn tabletkalaryn jasaıtyn bolamyz», - dep jaýap berdi Jaqsalıev.

Esterińizge sala ketsek, 2015 jyldyń 27 sáýirinde Qazaqstan Úkimeti óz qaýlysymen elimizde MAGATE-niń Tómen baıytylǵan ýran bankin «Úlbi metalýrgıalyq zaýyty» AQ-ynda ornalastyrý týraly kelisimge qol qoıýdy maquldaǵan bolatyn. Sol jyldyń 27 tamyzynda kelisimge Qazaqstan tarabynan Erlan Yydyrsov pen MAGATE-niń bas dırektory Iýkıa Amano qol qoıǵan edi.