Úkimettiń Ulttyq qordyń túbine jetetin túri bar. Búgin úsh jyldyq búdjetti bekitken depýtattar osylaı dep dabyl qaqty. Daǵdarys kezinde qajet aqshany mınıstrler ońdy-soldy shashyp júr deıdi májilismender. Sondyqtan Májilis búdjet tapshylyǵyn syltaýratyp, Ulttyq qorǵa qaıta-qaıta qol suǵýdy doǵarýdy talap etti. Biraq mınıstrler kabıneti bıyl halyqtyń turmysyn kóterip áleýmettik salaǵa kóp kóńil bóletinderine sendirýde.
Bul týraly Ktk arnasy habarlaıdy.
Basty qarjylyq qujatty qorǵaýǵa kelgen Baqytjan Saǵyntaevqa búdjetti bekitý ońaıǵa soqqan joq. Depýtattar aldaǵy úsh jyldyq shyǵyn jáne tabyspen tanysa salysymen, mınıstrler kabınetine dúrse qoıa berdi.
Azat Perýashev, Májilis depýtaty:
-Aldaǵy úsh jylda Ulttyq qordaǵy qarjy 9,5 mıllıard dollarǵa azaıyp qalady eken. Túsimi de tómendeıdi. Sizder búdjettiń kez-kelgen shyǵynyn Ulttyq qordaǵy qarjymen jabýdy ádetke aınaldyryp aldyńyzdar. Bul túrlerińizben qordaǵy aqshany taýysyp bitiresizder.
Ulttyq qordaǵy aqsha ońdy-soldy jumsalyp jatyr degen janaıqaıǵa sheneýnikter selt ete qoımady. Esesine, búdjet bekitilse jurttyń turmysy túzelerine sendirip baqty.
Baqyt Sultanov, Qarjy mınıstri:
-Jylyna 47 myń azamatty jumyspen qamtý qarastyrylady. Ol úshin úsh jyldyq búdjette 113,5 mıllıard teńge josparlanady. Ekinshiden, «Bıznestiń jol kartasy» baǵdarlamasy boıynsha kásipkerlikti qoldaý úshin aldaǵy úsh jylǵa 46 mıllıard teńge qaralady. Qoljetimdi turǵyn úıge 143 mıllıard teńge.
Ekinshi kezekte bilim berý salasy tur. Máselen, apattyq jaǵdaıda turǵan mektepterdi jóndeýge jáne jańa oqý ornyn salý úshin búdjet pen Ulttyq qordan 94 mıllıard teńge jumsalmaq. Sondaı-aq, bazalyq zeınetaqy da 9 paıyzǵa ósedi eken. Inflásıa deńgeıi bir qalypty, búdjettiń tapshylyǵy da belgilengen mólsherden aspaıtyn kórinedi. Biraq buǵan depýtattar aldana qoımady.
Nurtaı Sabılánov, Májilis depýtaty:
-Biz jylyna birneshe ret osy respýblıkalyq búdjetti naqtylaımyz. Úkimet te óz tarapynan kóptegen túzetýler engizedi. Saıyp kelgende Úkimet túpkilikti nátıjege qol jetkizetin búdjetti qamtamasyz ete almaı otyr. Memlekettik baǵdarlamalar tolyq oryndalmaıdy, kórsetkishter oryndalmaıdy, esep berilmeıdi.
Búdjetti qaıta qaraýǵa áli talaı keletinderin premerdiń ózi de moıyndap otyr. Tabys pen shyǵyn munaı baǵasyna tikeleı táýeldi bolǵandyqtan, qarjylyq qujatty birneshe ret ózgertýge májbúrmiz deıdi Saǵyntaev.
Baqytjan Saǵyntaev, Premer-mınıstr:
-Munaıdyń baǵasy geosaıası jaǵdaılarǵa óte táýeldi. Oǵan qosymsha Iraktaǵy, Sırıadaǵy bolyp jatqan jaǵdaılar da kóp áserin tıgizip otyr. Sol sebepten de búgin talqylaýǵa salyp otyrǵan búdjetke qarasaq, kiristerdiń 45 paıyzy negizinen munaı salasyna túsken qarjyǵa táýeldi.
Depýtattar basty qarjylyq qujatty tórt saǵatqa jýyq talqylap, uzaq tartysqanymen, sońynda bir aýyzdan qoldap daýys berdi. Bir anyǵy úkimet aldaǵy úsh jylda 25 trıllıon teńge jumsamaq. Al búdjet munaıdyń barreli 35 dollarmen eseptelgen. «Qara altynnyń quny» jıi qubylatynyn eskersek, túrli salaǵa bólingen mıllıondar kez-kelgen sátte qysqartylýy múmkin.
