«Qazaq arýy-2014» báıgesinde barlyǵynan oza shaýyp, halyqqa keńinen tanylǵan Gúlnáz, búginde aktrısa, telejúrgizýshi. Birneshe televızıalyq jobalarda boı kórsetip júrgen arýdy sózge tartyp, suhbattasýdy jón kórdik.

- Gúlnáz, otbasyńyz jaıly aıtyp berseńiz.

- Otbasymda eki adambyz. Men jáne anam. Ákesiz óstim. Úıde jalǵyz qyz bolǵandyqtan aıtqanymdy oryndatqyzatyn, erke qyz boldym. Eń bastysy, úlken mahabbat pen qamqorlyqty, jylýlyqty sezip, kórip óstim.  

-  Bárekeldi! Sizdiń oıyńyzsha 21-shi ǵasyrdyń minsiz bolmasa da soǵan jaqyn qazaq qyzy qandaı bolý kerek?

- Árıne, pende bolǵannan keıin kemshiliksiz adam bolmaıdy. Desek te ıdealǵa jaqyn qyzdar bar. Olardyń boıynan, eń aldymen, bilim, adamgershilik sekildi qasıetter tabylý kerek. Sonymen qatar, ózin ortada durys ustaı biletin, birneshe tildi erkin meńgergen, talǵammen kıinip, ózin kútetin, salt-dástúrimizden habary bar bolsa nur ústine nur.  

- Osy qasıetter Sizdiń boıyńyzdan tabyla ma?

- Ózim týraly aıtýǵa qınalamyn. Alaıda, meni jaqsy biletin adamdardan joǵaryda atap ótken qasıetter men de bar ekenin jıi estımin.

- Shet elde oqýdy armandaıdy ekensiz. Qaı mamandyq boıynsha bilimińizdi shyńdaǵyńyz keledi?

- Men kıno salasyn jetik meńgerýdi qalaımyn. Onyń tarmaqtary kóp qoı. Rejıserlik, prodúser, aktrısa sekildi. Qazir nanymdy aktrısa retinde taýyp júrgendikten ózimdi dál osy salady shyńdap, bilimimdi tereńdetkim keledi. Jyldap bolmasa da Eýropa, Amerıka elderindegi kıno stýdıalarda 3-4 aı oqysam degen maqsatym bar. Barlyǵy ýaqyttyń enshisinde, bolashaqta kóre jatarmyz.  

- Qazir jýrnalısıka fakúltetinde magıstratýrada oqýdasyz. Ony támámdaǵannan keıin gazetke maqala nemese televızıalyq jobalarǵa senarı jazý oıyńyzda bar ma?

- Qazirgi tańda eki salany qatar alyp kele jatyrmyn. Biri kıno bolsa, ekinshisi telearna. Ekeýinde de bilikti maman bolý, izdený, oqý paryzym dep esepteımin. Telejúrgizýshi bolǵandyqtan jýrnalısıkany oqýdy qajet dep sheshtim.

- Siz bir suhbatyńyzda «Qazir jigitter usaqtalyp ketti» degen edińiz. Sizdiń oıyńyzsha, naǵyz er-azamat qandaı bolý kerek?

- Meniń túsinigimde naǵyz azamat er minezdi bolý qajet. Iaǵnı, sózine, isine berik, qaısar minezdi, jigerli. Aıta berseń, kóp qoı. Eń bastysy, meni shyn súıse deımin.

- Sol ıdealyńyzdy taptyńyz ba?

- (Biraz oılanyp)Turmys quryp, bir otbasy bolǵansha, taptym dep aıtýǵa qorqamyn. Sondyqtan, ázirshe eshteńe aıta almaımyn.

- Siz jýrnalıserge bergen suhbatyńyzda «Qazir qoǵam jeńil-jelpi fılmder men serıaldardy jaqsy kóredi», - degen edińiz. Ózińiz túsken tele ónimderdi qandaı sanatqa jatqyzar edińiz?

- Men túsken jobalar suranysqa ıe. Onyń árbirinen oıǵa túıetin, sabaq alatyn dúnıeler bar. Sebebi, onda  shynaıy mahabbat, dostyq, satqyndyq, qazirgi qoǵamnyń kelbeti  kórinis tabady. Máselen, «Mahabbatym júregimde» telehıkaıasynda áleýmettik teńsizdikti, ádiletsizdikti baıqaısyz. Munyń barlyǵy shynaıy ómir ǵoı. Al telehıkaıanyń ekinshi bólimi «heppı endpen» bolmaıdy. Ádette, fılm, telehıkaıalardaǵy barsha keıipker sońynda baqytqa jetedi. Biraq, shynaıy ómirde, mıllıonnyń biri ǵana qıynshylyqty jeńip, baqytqa keneledi. Sondyqtan, munda pafosqa jol berip, shynaıy ómirden alshaq ketpedik. Al «Qustar ánine» keler bolsam, onyń orny aıryqsha. Sebebi, áıgili kúıshi kompozıtor, dırıjer Nurǵısa Tilendıevti árbir qazaq bilý qajet dep esepteımin. Osy turǵysynda qoǵamda «Qustar áni» sekildi ónimder kerek. Ol arqyly biz kúıshiniń ómiri, shyǵarmashylyǵymen tanysyp qana qoımaı, qazaq mádenıetin, ónerin kóre alamyz. Sondyqtan, mundaı jobalar kóp bolý kerek.

- Armanyńyzdaǵy ról bar ma?

- Qazaqstanda, ókinishke oraı, kıno ındýstrıasy qatty damymaǵan. Máselen,  Djonı Depp sıaqty túrli obrazdarǵa enip, bir-birine múlde uqsamaıtyn rólder somdaýǵa ázirshe múmkindik joq. Bul rette, men árbir úıdiń tórinde oryn alǵan qara jáshikte kórsetetin ónimderdi aıtyp otyrmyn. Sebebi, teatrda jaǵdaı múlde basqa. Máselen, akter búgin qaıyrshyny oınasa, erteń hannyń rólin somdaıdy. Desek te kıno, telehıkaıalarda boı kórsetip júrgen Berik Aıtjanovtyń obrazdary bir-birine uqsamaıdy, ártúrli. Al meniń qazirgi ampýlam – aýyldan kelgen qyz. Qandaı kastıngke shaqyrsa da aýyldan kelgen, ańqaý, aqkóńil, keıde aqyly bar, keıde aqymaq qyzdyń róline baıqap kóredi. Sol berilgen róldi óz deńgeıinde oınap, tájirıbemdi shyńdaý mindetim. Ony joǵary dárejede alyp shyǵyp, óssem degen oıdamyn. Keıin, odan da kúrdeli obrazdardy somdaý úshin pisip, jetilemin. Bálkim, bolashaqta jaǵymsyz keıipkerdi oınarmyn. Jas ta keledi degendeı. Odan keıin, jas, ańqaý qyzdyń rólin oınaı almaısyń. Barlyǵy óz retimen bolýy kerek.

-  «Osy róldi oınaýǵa eshqashan kelispeýshi edim» dep bireýin dóp basyp aıta alasyz ba?

- Menińshe, Qazaqstanda «Men osy róldi eshqashan oınamas edim» deıtindeı fılmder túsirilmeıdi. Sebebi, bizdiń mentalıtetimiz oǵan jol bermeıdi. Degenmen, naǵyz aktrısa eshqashan olaı aıtpaýy qajet. Sebebi,  qandaı ról bolsyn, ony alyp shyǵý aktrısanyń basty mısıasy.

- Gúlnaz, sońǵy oqyǵan kitabyńyz qandaı?

- Haled Hosseınıdiń «I eho letıt po goram»  kitabyn oqydym. Jazýshy Pákistan týraly jazǵan. Klasıka emes. Biraq, oqýǵa turalyq kitap. Al, qazaq ádebıetinen sońǵy márte «Aqbilekti» oqydym. Jalpy, súıikti jazýshylarym retinde, Muhtar Áýezov, Ázilhan Nurshaıyqovty ataı alamyn. Aqyndardan Muqaǵalı Maqataevtyń óleńderin súıip oqımyn.

- Keıipkerińizdiń aýyr taǵdyryn júregińizge jaqyn qabyldap, obrazdan shyǵa almaı júretin sátterińiz bola ma?

- «Taraz» fılminde, túsirilim bastalǵanda rólge kirip, jylaý qajet bolsa, jylaısyń.  Bireý aıqaılap, tóbelesip jatady. Alaıda, rejıserdiń «Stop» degen sózinen keıin barlyǵymyz kúlip, qaljyńdasyp, túsirilim alańynda jyly atmosfera ornaıdy. Barlyǵymyz tatýlasyp kettik.  Rejıserimiz de óte kóńildi adam. Al «Mahabbatym júregimde» telehıkaıasynyń 1-shi maýsymy kóńil-kúıime áser etti. Sebebi, senarı aýyr boldy jáne eń alǵashqy tájirbıem degendeı. 1 aı boıy serıaldaǵy kóńilsiz epızodtardy oınaǵanda, júregime jaqyn qabyldadym. Qaı jer jumys, qaı tusy ómir ekenin arajigin ajyrata almaı qaldym ba? Biraq, ýaqyt óte kele barlyǵy ornyna keldi. Óz basym akterdiń somdaǵan roli ómirine áser etetinine senemin. Ony óz tájirbıemnen aıtyp otyrmyn. Bálkim bul jaı ǵana sáıkestik shyǵar. Biraq, az-maz bolsa da senarıdegi taǵdyr qaıtalatyn ýaqyttar bolady.

- Ózińizdi 10 jyldan keıin, qalaı elestetesiz?

- Aıaýly ana, ardaqty jar. Telejúrgizýshi ári aktrısa. Sonymen qatar, otbasyna da, jumysyna da ýaqyt taýyp júrgen adam retinde elestetemin. Múmkin, tipti basqa salaǵa ketip qalatyn shyǵarmyn. Ony ýaqyt kórsetedi.

- Rahmet! Barlyq armandaryńyzǵa jetýge tilektespiz!

- Rahmet!

Suhbattasqan: Ásem ÁLMUHANBET