Ǵalamtorda "Aıakózdegi atys" týraly vıdeo tarady. Atalǵan beınejazbada qys kúni kósheni boılaı qashqan "jıgýlı" avtokóligin vıdeo túsirilgen kóliktiń qýalaǵany, qashqan kólik kenetten toqtap, ishinen shyqqan belgisiz er adamnyń nysanasyz oq jaýdyrǵany kórinedi. Atalǵan oqıǵaǵa baılanysty "Qamshy" tilshisi Aıakózdiń İİB-ine habarlasyp aqparat ala almady. Alaıda, Aıakóz turǵyndarynan istiń mán-jáıin surap bildi. 

Aıakóz turǵyndarynyń aıtýynsha, vıdeo dál Aıakózdegi jaǵdaıdyń vıdeosy bolmaýy da múmkin. Biraq, keshe keshki ýaqytta Aıakózdiń ortasyn bólip jatqan temir jol mańynda, ortalyq alań tusynda atys bolǵan. Beıresmı habar boıynsha 1995 jáne 1996 jylǵy eki azamat aýyr jaraqattanyp aýrýhanaǵa túsken. Bireýine 16 oq tıgen. Al ekinshi azamat temir soıylmen qatty soqqy alǵan. Ázirge oqıǵanyń naqty qalaı bolǵany belgisiz. 

Al, atalǵan jaǵdaıdy Shyǵys Qazaqstan oblysy İİD joqqa shyǵarǵan. "SHQO-da atys boldy dep, jalǵan vıdeo taratqan adamǵa 10 mıllıon teńge aıyppul salynady nemese ol bas bostandyǵynan aıyrylady. Qaskúnemderdi qazirgi ýaqytta Shyǵys Qazaqstan oblystyq İİD qyzmetkerleri izdep jatyr." delingen departament habarlasynda. 

"Mundaı vıdeony tarap jatqanyn biz bilemiz, - deıdi SHQO İİD baspasóz qyzmetiniń jetekshisi Baqytjan Torǵaev. - Atap aıtamyn, Aıagózge bul vıdeonyń esh qatysy joq. Onyń ústine, aldyn ala málimet boıysha, rolık 2015 jyly Reseıde áleýmettik jelilerde taralǵan. Vıdeo Reseıde túsirilgen bolýy da múmkin. Bul tipti Qazaqstan emes! Bul vıdeony taratqandardy jedel izdestirip jatyrmyz. Jaýapty adamdar 5 000 AEK kóleminde aıyppul arqalaıdy (10 605 000 teńge) nemese 2 jyldan 5 jylǵa deıin bas bostandyǵynan aıyrylady", - dedi ol.