Bıyl Qurmanǵazy aýdany Ganúshkıno poselkesinen 100 shaqyrym qashyqtyqtaǵy ıesiz qalǵan eki uńǵymadan aýmaǵy 30 ga jerge munaı qaldyǵy tógildi. Uńǵymalardyń ıesi – «Qoljan-Oıl» JSHS dep jazady Aq jaıyq basylymy.

Keltirilgen zalal quny 800 mln teńgege baǵalanyp otyr. «Qoljan-Oıl» JSHS Dyńǵyzyl aýyldyq okrýgine qarasty «Kúmisbek» ken ornynda munaı óndirý jumystaryn 2004 jyly júrgizip bastaǵan bolatyn.

Qurmanǵazy aýdanynyń ákimi Bıboz Shaıahmetovtiń aıtýynsha, «Qoljan-Oıl» JSHS budan úsh jyl buryn belgisiz sebeptermen óz jumysyn toqtatqan. Atalmysh ken ornynda tumshalanbaǵan alty uńǵymamen birge, 60 tonnalyq maı toltyrylǵan eki sısternany qaldyryp ketken. Bıyl eki uńǵymadan munaı qaldyǵy aǵyp, edáýir jerdi búldirip tastaǵan.

«Bul jerge bizdiń malymyz jaıylady. Al mal aýyryp qalsa nemese ýlanyp ólse, oǵan kim jaýap beredi? Jerdi búldirip ketkender halyqty oılamaıdy, qaltasyn oılaıdy. Jerimizdi lastap otyrǵan mekeme basshylyǵyn nege jaýapkershilikke tartpaıdy?», – deıdi jergilikti turǵyndar.

Kúzde arnaıy komısıa qurylyp, ken ornyndaǵy tehnogendik sıpattaǵy tótenshe oqıǵanyń zardaptaryn zerttedi.

Sonyń ishinde jer qoınaýyn paıdalanýshy «Qoljan-Oıl» JSHS-niń «Jer qoınaýy jáne jer qoınaýyn paıdalanýshylar týraly» QR Zańynyń 111-baby 2-tarmaǵynda kózdelgen talaptardy buzyp otyrǵandyǵy anyqtaldy: «Jer qoınaýyn paıdalaný jónindegi operasıalar ýaqytsha toqtatylǵan kezde jer qoınaýyn paıdalanýshy quzyretti organmen obektini ýaqytsha konservasıalaý (jumystardy toqtata turý) merzimderin kelisedi jáne jer qoınaýyn paıdalaný obektisin konservasıalaý jónindegi jumystardy oryndaýǵa dereý kirisedi, al jer qoınaýyn paıdalaný jónindegi operasıalar toqtatylǵan kezde jer qoınaýyn paıdalaný obektisin joıý jónindegi jumystardy oryndaýǵa dereý kirisedi.

Óndirýdi toqtatý týraly shuǵyl sheshim qabyldaý qajet bolǵan jaǵdaıda, jer qoınaýyn paıdalanýshy olardy joıý nemese konservasıalaý bastalǵanǵa deıin óndiristik obektilerdiń saqtalýyn qamtamasyz etetin is-sharalar keshenin júrgizedi».

Óz kezeginde Atyraý oblysy boıynsha Ekologıa departamenti uńǵymadan aqqan kómirsýtek shıkizattarynyń kólemi únemi ulǵaıyp, ken ornyndaǵy jer qabaty men jerasty sýlarynyń búlinýine ákelgendigi týraly qorytyndy akti jasady.

Departament «Kúmisbek» ken ornyndaǵy tótenshe oqıǵa saldarynan qorshaǵan ortaǵa keltirilgen zalal kólemin 800 mln-nan astam teńgege baǵalady. Qazir ekologıa departamenti «Qoljan-Oıl»-dyń ústinen zalaldyń ornyn toltyrý týraly sotqa talap-aryz berdi. Alaıda, atalmysh mekemeniń basshylyǵyn izdep tabý ázirge múmkin bolmaı otyr.

«Qazir «Qoljan-Oıl» JSHS-ine shyǵý múmkin bolmaı otyr. Telefon arqyly baılanysa almadyq, sondyqtan Almaty qalasyndaǵy mekenjaıyna hat joldadyq, biraq, odan da eshqandaı jaýap kelmedi», – deıdi Qurmanǵazy aýdany ákiminiń orynbasary Jastilek Hasanov.

«Qoljan-Oıl» JSHS-niń ádilet organdarynan resmı tirkeýden shyǵarylǵany nemese sot sheshimimen bankrot dep tanylǵany jóninde aqparat joq.

Jer máselesi ózekti bolyp otyrǵan tusta bul jaǵdaı kim-kimdi de beı-jaı qaldyrmasy anyq: ken orny úsh jyl qaraýsyz qalǵan jáne uńǵymalardan munaı qaldyǵynyń aǵýy keshe ǵana emes, jarty jyl buryn da emes. Tabıǵı resýrstarǵa keltirilgen zalal kólemi orasan. Búlingen jerdi qaıta qalpyna keltirý jumystary keshiktirilip qolǵa alynsa da, bul jerde áli eshteńe bolmaıdy.