Ýaqytsha ustaý ızolátorynda Sherzat Polattyń ólimine kúdiktilerdiń týǵan kún toılap jatqany týraly vıdeo taralǵanyn qorǵaýshy Saıda Táýekelova habarlady.

Atalǵan vıdeoda kúdiktilerdiń telefon ustap, "Alısaǵa" án qoıdyryp, tortqa sham jaǵyp, kóterińki kóńil kúıde ekeni baıqalady.

Almaty oblysynyń Polısıa departamenti atalǵan jaıtqa baılanysty qyzmettik tekseris júrgizilip jatqanyn habarlady.

– Qamaýdaǵynyń biriniń týǵan kúnin atap ótý sáti jazylǵan beınejazbanyń taralý faktisi boıynsha jan-jaqty tekserý júrgizilýde. Barlyq kináli tulǵa, sonyń ishinde basshylyq ta, qatań jaýapkershilikke tartylady. Tergeý barysy erekshe baqylaýǵa alyndy. Osy quqyq buzýshylyqqa yqpal etken sebepter men jaǵdaılardy joıý boıynsha sharalar qabyldandy, – delingen departamenttiń áleýmettik jelidegi resmı paraqshasynda.

Eske salaıyq, 22 qańtarda polısıa Sherzat isi boıynsha qylmystyq isti tergeý aıaqtalǵanyn málimdegen.