Qýanǵan Qızatbek
 
 
Gıtarıst 
 
Men úshin qymbat emes syı sharaby,  
Únine ǵashyq edim gıtaranyń.  
Ylǵı da ıyǵyma basyn súıep,  
Kúrsinip qońyrqaı qyz kúı shalady.  
 
Torqaly týǵan jerdiń topyraǵy,  
Torǵyn qyz janaryna tosylady.  
Termelep gıtaranyń alty ishegin,  
Kirpigin oıǵa malyp otyrady.  
 
Muńaıý oǵan qatty unasady.  
Mundaıda kúbir etý kúná taǵy.  
Saýsaǵy sıpap ótken pernelerden,  
Notalar qyzyl-jasyl gúl ashady.  
 
Aıtarym til ushynda tur baılanyp,  
Yrǵaqtar qushaǵyna yrǵaıdy alyp.  
Náp-názik qyl ishektiń dirilmen,  
Júregim barady ushyp býǵa aınalyp.  
 
Tátti áýen, tartymdy qyz bar asylym,  
Tapqany-aı tabıǵattan jarasymyn.  
Gıtara shanaǵyna oralady ol,  
Kúıdirip bir saǵynysh qarashyǵyn…

Melodıa jáne mezgil  
 
Iyǵyńa tógilip buıra shashyń,  
Kúlimsire,  
Sezimniń súı rahatyn.  
Gıtarshi qyz,  
Jabyqqan júregimdi,  
Shyryn áýen izdeımin shıratatyn.  
 
Qobaljyǵan oıymen qońyr dala,  
Qupıama qaraıdy nege urlana?   
Gıtaranyń pernesin peıilsizdeý,  
Aq saýsaǵyń sıpaıdy jeńil ǵana.  
 
Kóktem ediń,  
Kúrsindiń kúzge aınaldyń,  
Qarashanyń demine muzdaı qaldym.  
Qaıtqan qazdyń suńqylyn qaıǵyly ishek,  
Syńsyp aıta bererdeı buzbaı máńgi.
 
 
Kirpigińe qonaqtap kúmis eppen,
Áppaq qyraý tógildi sym ishekke.  
Osylaısha ketesiń qysqa aınalyp,  
Mahabbattyń asqanda muńy shekten.  
 
 
Gıtaraniń shanaǵy áppaq qyraý,  
Qoıý qara shashyńa qaptap qylaý.  
Qar astynda qalǵısyń,  
qulazytpaı,  
Tebirene oıanshy táp-táttim-aý!   
 
Kóktemińdi kóksedim,  
Uıyqtamadym.  
Alty ishekti terbeshi, (súıt, qaraǵym)  
Qazdar qaıta oralsyn qanatymen,  
Sıpaı ushyp shanaǵyn gıtaraniń.   

Tart qane gıtarańdi…  
 
Tart qane gıtarańdi,  
Bilem ishteı,  
Bar sende ómir jaıly irenishti oı.  
Qaljyrap qozǵalady saýsaqtaryń,  
İshekter shubatylǵan relisteı.  
 
Qalyńdap qabaǵyńda nala-qaıǵy,  
Qap-qara kózderińdi qamalaıdy.  
Japanda jolyǵatyn bireý bardaı,  
Janaryń relisti jaǵalaıdy.  
 
Tym muńly gıtarańda búgingi áýen,  
Áli de súıkimdi ǵoı sýynba álem.  
Súıenip álsiz, muńly dybystarǵa,  
Bekitip turǵandaısyń býyndy áreń.  
 
Shattyqtyń sheshek atqan gúli shette,  
Tabylmaı oǵan bastar durys ótkel.  
Tógilip saýsaǵyńnan qaıǵy ýyty,  
Solqyldap jylaı berdi sym ishekter.  
 
Qorǵanba, qaıratyńa qolyńdy ber,  
Ol seni qutqarýdyń jolyn biler.  
Tart qane,  
Sulý áýen padıshasy,  
Perneden syılar saǵan senim-jiger.  
 
 
Tazartý

Ushyrdy kóbelegin kóz ǵalamyń,  
Taǵy da gıtarańdi qozǵa janym.  
«Aqylym» alty ishekpen arqandalyp,  
Jutylsyn shanaǵyna «Sozǵan ánim» .  
 
Kóbelek-kózińdegi qýanyshyń,  
Qanatyn qaǵady ushyp shýaq úshin.  
Áýendi álem etken kóbelekter,  
Keshirmes kir qoǵamnyń kúnáli isin.  
 
Adamnyń ar bolmasa esimi kim?   
Bolmasyn kúnaharǵa keshirimiń.  
Syńsyǵan sulý, taza áýendermen,  
Úreıli úńgirlerdiń óshir únin.  
 
Ǵaıbattar,  
Kúpirlikter,  
Balaǵattar,  
Tilinde tirilerdiń qara daq bar.  
Ýyty kúshtilerdiń ýysynan,  
Baýyry áli jumsaq dalany ap qal.  
 
Tátti únmen tebirensin tereń dala,  
Alty ishek qozǵalǵanda álem jańa.  
Ajarsyz álde kimniń aıǵaıy emes,  
Aýada qalqyp tursyn áýen ǵana.

Tyńaıý
 
Júregim aýyryp tur búgin meniń,  
Bireýge jaqpaıdy eken kúbirlerim.  
Qolyńa al gıtarańdi budan basqa,  
Kóńildiń asha alady kim ilgegin.  
 
Sóz osy seni qulaı súıemin men,  
Isharat jasadyńba ıegińmen?   
Men izdegen meıirli áýendegi,  
Notalar júzińdegi kıeli meń.  
 
Bilemin bul qoǵamnyń mıy isteıdi,  
Biraqta mahabbatpen súıispeıdi.  
Alqońyr gıtarada meıirli áýen,  
Tup-týra júregimnen ıiskeıdi.  
 
Terbelgen gıtaraniń alty ishegi,  
Qorlansam namysymnyń qamshysy edi.  
Aryna jamaý túsken «Jadaý» úshin,  
Júregim jylamasqa ant ishedi.  
 
Tartasyń gıtarańdi tártippenen,  
Shanaǵyn aımalaımyn shalqyp tóbem.  
Sarnaǵan nán saraıda sazdy aspaptan,  
Men seniń gıtarańdi artyq kórem.

daıyndaǵan: Bulǵyn Sýsar