Almatyda el Táýelsizdiginiń 25 jyldyǵyna arnalǵan “Altyn dombyra-2016” respýblıkalyq aqyndar aıtysy ótti. “Altyn dombyrany” osymen ekinshi márte Syr óńiriniń aqyny Muhtar Nıazov jeńip aldy. Kópshilik osy sharadaǵy Erkebulan Qaınazarov pen Muhtar Nıazovtyń arasyndaǵy aıtystyń óte tartysty ótkenin, Erkebulannyń Muhtarǵa qaratyp aıtqan shýmaqtary kóptiń kóńilinen shyqqanyn aıtady. Endeshe Erkebulan Muhtarǵa ne aıtty, oqyp kórelik:

…Sheıh Muhtar ıbn Nıaz ál-Aqmeshit,

Aqıdań Ahlı-súnná saýap desip.

Jaınamazda jolyqqan jigitter ek,

Bir táýlikte bes ret «qamat» desip.

Keri qaraı júretin boldyń qazir,

Asyǵys máseleńdi aǵat sheship.

Jaz boıy Astanaǵa kelmep ediń,

Týǵandy er týǵan jerde qalad desip.

Arqar aýǵan aıazda aýysypsyń,

Aqmeshitten Arqaǵa qar ap kóship.

Aıaq asty aıazǵa urynǵan soń,

Júrmisiń jyrtyq penen jamap tesik?

Otqa jaǵyp jylynǵan sekildisiń,

Shalbaryńnyń balaǵyn sholaq kesip.

Aýzyńdy úsik shalyp ketpesin dep,

Shyǵypty-aý saqalyń da zamatta ósip.

Hanafı ekenińdi bilmeıtinder

Shatasatyn boldy ǵoı sáláf desip.

Bul saqal bolmasa da jigitke aıyp,

Talaılar júr isinen shyǵyp taıyp.

Qazir el saqaldydan shoshyp júr ǵoı,

Desek te kóńilińizdi sýytpaıyq.

Qarsylastyń kelbetin kórgennen soń

Keýdemde bara jatyr kúdik baıyp.

Keshe ǵana qalany qan qaqsatqan

Qylmyskerdiń sýretin suryptaıyq.

Áı, bala, beri qarashy, qatty uqsaısyń,

Kállektıviń emes pe Kúlikbaev?

Mynany bul aıtysqa qalaı qosqan?

Tizimdi qarap júr ed Qyryqbaev.

Atystyń mańaıynda júrgenderdi

Aıtystyń mańaıyna jýytpaıyq.

Shyqqan soń jaqsylap teksereıik,

Ketpesin bir taksıge minip taıyp.

Muhamedjan aǵa, bal berer kezde

Dástúrli dinimizdi ulyqtaıyq.

Qazaqıa eliniń ustanymy

Hanafı ekendigin umytpaıyq!

Derekkóz: saigez.kz