Qaıran eldiń móltildep jas kózinde,

Syna túsken syn sátte tas tózimge,

Bir top ulan "Alash!" dep sýyryldy

Jıyrmasynshy ǵasyrdyń bas kezinde.

Ǵalamat kúsh tereńde tunyp keldi,

Saı tasyndaı kileń er irikteldi.

Abylaıdyń aq týyn arqalanyp,

Tuńǵysh "Alash ordaǵa" birikken-di.

Birdeńeni sezgendeı dala tynǵan,

Kóz shalady búrkittiń qanatyn qan...

Jarqyldady Altaıdan naızaǵaılar

Er Túriktiń teginen jaratylǵan.

Az ýaqytqa halqymnyń baǵy jandy-aı,

Bolashaqtyń atady tańy qandaı?..

Ul shyqqyn-dy: Álıhan, Ahmetteı,

Mirjaqyp pen Mustafa, Maǵjandaı…

Bar qazaqtan Arystar – aldasyńdar,

Bárińniń de búginnen jalǵasyń bar.

Baqytjan men Raıymjan, Turaǵuldar,

Halel, Jahansha, Qoshkeler, qaıdasyńdar?

Kóktesińder, bilemin Aıdasyńdar,

Qazaǵymnyń tórine jaıǵasyńdar.

Muhametjan, Maǵjan, Shákárimder,

Alashtyń arda uldary qaıdasyńdar?

Ýaqyt jyljyp, ótken kún alystady,

Otqa órtendi Arystar namystary.

Senderdi izdep, bul qazaq alańdaýda,

Qaıdasyńdar, Alashtyń Arystary?

Bul qazaqtyń jaılaýy, kúzdeýmenen

Túgi qalmaı joǵalǵan sizdermenen.

Táýelsizdik alǵaly jıyrma jylda

Qazaǵym júr Baqytyn izdeýmenen.

Alaıaqtar jortyp júr bezdeńdegen,

Úndemeıtin qaýipti sezgenmenen...

Ótse daǵy bir ǵasyr sodan beri

Qazaq áli sol kezden ózgermegen

Keneýi joq turatyn qyl-qurttardan,

Kileń qyzyl Máskeýden buıryqty alǵan,

Atyp-asyp Alashtyń kózin qurtqan

Kileń teksiz qul-qutan bılikti alǵan.

Shyndyqty aıtsam júrekten shyqty zarym,

Keshshelerge men qalaı uqtyramyn?..

Sol quldardyń tórtinshi urpaǵy ma,

Bıliktegi búgingi «myqtylaryń»?..

Áýlekiler tórimde taırańdaǵan

Shúldirlegen tiline qaıran qalam!..

«Qul jıylyp, bas bolmas...» degen sózdi

Bostan-bosqa aıtpaǵan qaıran Babam!

Bir, bir nary qazaqtyń – shet kúnderde,

Shyńdaryna Altaıdyń shóktińder me?

Kúnnen týǵan kileń er otqa oranyp,

Kúnge sapar shynymen shektińder me?

Qum bolǵanyn kórgende kektiń demde,

Kóldeı-kóldeı kóz jasyn tóktińder de,

Ádilettik taba almaı alty Alashtan

Kókbórige aınalyp kettińder me?...

Týǵan ulttyń júrgende qozǵap qalin,

Qıa joldan san ret ozdy attaryń.

El bolǵanyn kóre almaı bul Qazaqtyń

Kettińder me, armanda bozdaqtarym!?

Qoıar emes otpenen oınaǵandar,

Obyp jatyr, jep jatyr... toımaǵandar.

Senesiń be, saýsaqpen sanarlyqtaı

Qazaq qamyn búginde oılaǵandar...

Qajet emes aqylgóı, aqyn elge,

Jarymaǵan ult boldyq: Batyr, Erge!

Kelip alyp Bılikke teksiz quldar

Áńgir taıaq oınatyp jatyr elge.

Sol baıaǵy óńsheń qul asap jatyr,

Birin-biri urýǵa tas ap jatyr...

Dinsiz, tilsiz qul-qutan eldi tonap,

Oılaryna kelgenin jasap jatyr...

Taltań qaǵyp qazaǵyn tanymaǵan

Bıliktegi tóreniń bári nadan.

Qul-qutandar – shetinen jaǵympazdar

Jáne jemqor ýyzǵa jarymaǵan.

Jaǵympazdar – erekshe elengender,

Bılik tutas turady kereńderden.

Ury-qary jaılaǵan qazaq ishin

Kelimsekter – qurmetke bólengender.

Sizder barda jaǵdaıym ertegi edi,

Ókinishten búgin ish órtenedi.

Osylardan ultymdy qutqaratyn

Qaıdasyńdar, Alashtyń Serkeleri?..

Sizder edi-aý ultymnyń naǵyzdary,

Qaıdasyńdar, Alashtyń Abyzdary?

Qul-qutandar qazaqty qorlap bitti-aý,

Shaınańdaǵan aýyzda saǵyzdary...

Sender eńder – Qazaqtyń Namystary,

Sender eńder – ultymnyń nar ustary!

Qutqaratyn Qazaqty teksizderden

Qaıdasyńdar, Alashtyń Arystary?..

Sol bir kúnder ertegi alystady,

Qul-qutannyń bılegen aýyshtary.

Qutqaratyn Qazaqty kirmelerden

Qaıdasyńdar, Alashtyń Arystary?

Jumash KÓKBÓRİ, aqyn.