Rejıser Talgad Jánibekov ustalyp, Almaty İİD ýaqytsha ustaý ızolátoryna qamaldy dep habarlaıdy tengrinews.kz

"Búgin ony "qylmys ornynda quryqtaldy" dep ustap áketti. Ustaý týraly qaýlyda solaı jazylǵan. Kúlkili. 72 saǵatqa ustaý úshin adam qylmys ornynda ustalýy kerek", - dep habarlady Serik Aıtbaev.

Buǵan deıin Talgad Jánibekov eshqaıda ketpeý týraly qolhatpen jiberilgen. Advokatynyń aıtýynsha, bultartpaý sharasyn ózgertýge prokýrordyń nemese tergeý sýdıasynyń sanksıasy qajet.

"Sondyqtan osyndaıdy oılap tapqan, 72 saǵat ustaý úshin. Bizge 1000 AEK kóleminde kepilaqy berý týraly resmı túrde habarlady, sonda ǵana barlyǵy jaqsy bolady eken", - dedi advokat.

Talgad Jánibekov "Fenıks" fılminiń túsirilimderine arnalǵan qarajattyń jymqyrylýy isinde kúdikti. Tergeýdiń málimetinshe, rejıserge senip tapsyrylǵan múlikti ıemdendi nemese jumsap qoıdy degen kúdik keldi. Onyń kinási dáleldense múlki tárkilene otyryp, 7 jyldan 12 jylǵa deıin bas bostandyǵynan aıyrylady.

Aıta keteıik, osy daýly fılm boıynsha belgili akter Tuńǵyshbaı Jamanqulov ustalyp, keıin kepilaqymen bosatylǵan edi. Ol 79 mıllıon teńge jymqyrdy degen kúdikke ilingen. Keıin ol óz kinásin moıyndap, qarajattyń 6 mıllıon teńgesin qaıtarǵan. Memlekettik qyzmet isteri jáne sybaılas jemqorlyqqa qarsy is-qımyl jónindegi agenttiktiń tóraǵasy Qaırat Qojamjarovtyń aıtýynsha, ártis "Qazaqfılmge" qaryzdy óndirip berýge ýáde etken.