- Álemde bolyp jatqan sońǵy oqıǵalardyń kórinisi aqparattyq soǵystyń aıqyn nátıjesi, - dep jazady belgili telejúrgizýshi Asqat Sadyrbaı jelidegi paraqshasynda.

Ókinishke oraı qazaqstandyqtar aqparat alýda, izdeýde otandyq jáne reseılik buqaralyq aqparat quraldarymen ǵana shekteledi. Til bilmegendikten kez-kelgen jańalyqtyń orysshasyn izdep oqımyz. Derekkózge mán bermeımiz, Amerıka, Eýropa, aǵylshyn baspasózderi qaı jańalyqty qaı ýaqytta qalaı bergeninen beıxabarmyz. Bul tek qalyń buqaraǵa ǵana emes otandyq BAQ-ǵy jańalyqtar qyzmetinde jumys istep júrgen áriptesterge de qatysty. Internet qaryshtap damyp, spýtnıktik telearnalarǵa qolymyz jetip qýanǵanymyzben aqparat keńistigimizdiń kúnnen-kúnge tarylyp, sál de bolsa saıasılanyp bara jatqan sıaqty ekenin baıqaý qıyn emes. Mysaly, aldyńgúni Sırıaǵa saparǵa shyqqan Reseıdiń 100-ge jýyq azamaty TÝ-154 ushaǵymen apatqa ushyrap qaza boldy. Jantúrshigerlik aýyr oqıǵa. Qara teńizden onshaqty ǵana adamnyń máıiti tabyldy, qalǵandary áli izdestirilýde. Biz de kórshiles elge kóńil aıtyp, qaza bolǵandardyń otbasyna sabyr tiledik. Eshqandaı artyq maqsaty joq, ártister, jýrnalıser, bas-aıaǵy toqsan úsh adamnyń bir sátte opat bolýy júrekke tıedi. Bul jerde ulty, dini, násili ról oınamaıdy. Adam ba adam. Bireýdiń ákesi, bireýdiń balasy... Baıqasańyz, Reseıdiń búkil telearnasy, baspasózi, saıttary mınýt saıyn bolǵan jaıttan xabar berip, jarysa jazýda. Bizdiń aqparat quraldary da ádettegideı qyzmet atqarýda.
Al, Sırıadaǵy soǵystan sońǵy 5 jylda kóz jumǵandardyń sany keıbir derekkózderdiń málimdeýinshe 300.000 ǵa, keıbiriniń aıtýynsha 500.000 ǵa jetken. Olar da adamdar, ol jerde de jazyqsyz japa shegip jatqandar bar. Analar, balalar... Biraq biz júz myńdaǵan jurttyń ómirine emes, júz shaqty adamnyń taǵdyryna ǵana qaıǵyryp otyrmyz... Áleýmettik jelilerde bul jóninde neshe túrli pikirtalastar bop jatyr. Biraq ol ne beredi? Bul jaǵdaı meni adam retinde de, jýrnalıs retinde qatty alańdatady. Ary qaraı ne bolar eken?