Reseılik saıasattanýshy Andreı Kazansevtiń oıynsha, Astana prosesi Sırıa máselesin retteýge yqpal jasaı alsa, Nursultan Nazarbaevty beıbitshilik úshin Nobel syılyǵyna usynýǵa ábden bolady, dep xabarlaıdy QazAqparat

 "Qazaqstan BUU Qaýipsizdik keńesiniń turaqty emes múshesi retinde úlken mindetti moınyna alyp otyr. Onyń Sırıa máselesin retteýge degen qulshynysy óz nátıjesin berýi de múmkin. Alaıda, ol jaqtaǵy jaǵdaı óte qıyn bolyp tur. Sebebi Sırıadaǵy shıeleniske bir emes, birneshe memlekettiń qatysy bar. Sondyqtan ony rettegennen buryn, ýshyqtyra túspeý asa mańyzdy. Ol úshin qyrýar dıplomatıalyq kúsh-jiger kerek. Osy oraıda, úlken dıplomatıalyq daryny bar saıasatkerimiz - Nursultan Nazarbaevtyń bar ekenin erekshe atap ótken jón. Ol óziniń eńbek jolynda syrtqy saıasat jaǵynan áli birde-bir ret qatelesken joq. Onyń basty artyqshylyǵy sol, ol kez kelgen jaǵdaıda durys balans taba alady, qarama-qaıshy múddeler toǵysynda tepe-teńdikti saqtaı biledi. Sol sebepti Nursultan Nazarbaev álemdik saıasat deńgeıinde óz qarym-qabiletin taǵy bir márte kórsetýge múmkindik aldy", - dedi Kazansev búgin Qazaqstan strategıalyq zertteýler ınstıtýtynda ótken jıynda.

Beınebaılanys arqyly shyqqan saıasattanýshynyń pikirinshe, Qazaqstan dál osy Sırıa máselesin retteý boıynsha naqty bir nátıjege qol jetkize alsa, Nursultan Nazarbaevty beıbitshilik úshin Nobel syılyǵynan úmitkerlerdiń qataryna qosýǵa ábden bolady. Aıta keteıik, qatardyń 23-i kúni Astanada Sırıa daǵdarysyna qatysty beıbit kelissózderdi (Astana prosesi) ótkizý josparlanǵan.