Aqtaýda táýelsiz kásipodaq konfederasıasyn tirkeýdi talap etken ashtyq aksıasy májbúrli túrde toqtaǵan. Ákimshilik sot 15 adamdy Qazaqstan ákimshilik quqyq buzý kodeksiniń 488-babyn (zańsyz sherý, mıtıńi, pıket ótkizý) buzǵany úshin aıypty dep tanyp, azamattarǵa 50 aılyq eseptik kórsetkishke deıingi aıyppul salǵan. Bul týraly Azattyq jazdy.
Juma kúni Aqtaýda «Táýelsiz kásipodaqtar konfederasıasy taratylmasyn» degen talappen ashtyq jarıalaǵan munaıshylarǵa qatysty sot úkimi shyqty. Olardyń 2 apta boıy nár tatpaı narazylyq tanytýyn №2 Aqtaý qalalyq soty zańsyz dep tanydy.
Sondaı-aq, qujatta: «Oil Construction Company» seriktestigine qarasty jumysshylar men kásipodaq basshylary kásiporynnyń ǵımaraty men aýmaǵyn bosatýy tıis», delingen.
Aqtaýda Qazaqstan táýelsiz kásipodaqtar konfederasıasyn tirkeý týraly talappen Oil Construction Company (OCC) kompanıasy kásipodaq keńsesinde eki aptadan astam ýaqyt jalǵasyp jatqan jappaı ashtyq aksıasy senbi kúni tús shamasynda polısıa talaby boıynsha toqtatylǵan.
Keńseden shyqqan jumysshylardy esik aldynda tosyp turǵan polısıa qyzmetkerleri tizimge alyp, qoldaryna Aqtaý ishki ister basqarmasyna shaqyrtylatyny týraly qaǵaz tapsyrdy.
Birneshe kún boıy tamaq ishýden bas tartyp, qaljyraǵan munaıshylardyń keıbirine polısıa ákimshilik is qozǵap, senbi kúni keshke olardyń isin Mańǵystaý oblystyq aýdanaralyq ákimshilik soty qarady. Sotqa jýrnalıser qatystyrylmaǵan.
Sondaı-aq, Astananyń Almaty aýdandyq soty qańtardyń 21-i kúni Mańǵystaý oblysynda eki aptadan astam ýaqyt ashtyq jarıalap kelgen júzdegen munaıshylarǵa jetekshilik etken Oil Construction Company kompanıasy kásipodaǵy lıderi Ámın Eleýsinov pen kásipodaq eńbek ınspektory Nurbek Qoshaqbaevty eki aıǵa tutqyndaýǵa sanksıa berdi. Ol ekeýi sonyń aldynda Astanadan Aqtaýǵa jetkizilip, qylmystyq aıyptar taǵylǵan.
Qańtardyń 4-i kúni Ońtústik Qazaqstan oblystyq aýdanaralyq ekonomıkalyq soty keńsesi Shymkent qalasynda ornalasqan konfederasıa "zańmen belgilengen merzimde jergilikti fılıaldaryn tirkeýden ótkizbegeni" úshin jabylatyny týraly sheshimin jarıalaǵan bolatyn.
Aıta ketsek, Táýelsiz kásipodaqtyń tirkelmeýi 2014 jylǵy kásipodaqtar týraly zańǵa tikeleı baılanysty. Qazaqstanda buǵan deıin eki túrli kásipodaq uıymy (naqtyraq aıtqanda konfederasıasy) bolǵan. Olardyń biri "Qazaqstan kásipodaqtar konfederasıasy" de ekinshisi osy munaıshylar jaqtap otyrǵan "Qazaqstannyń táýelsiz kásipodaqtar konfederasıasy". Sońǵysynyń respýblıkada 40 shaqty bólimsheleri bar edi. Biraq zań boıynsha 6 aıdyń ishinde tirkelmese olardy konfederasıa quramyna qospaıdy. Sondyqtan 6 aıda tek 20 shaqtysy ǵana tirkelgen.
