Dımash Qudaıbergenov Qytaıdyń I am a singer (Men ánshimin) telebaıqaýyna qatysyp, saıystyń birinshi kúninde qazylar alqasy tarapynan eń joǵarǵy upaı jınap, jeńimpaz atandy.

Dımash Qudaıbergenov uıymdastyrýshylar tarapy usynǵan «SOS d'un terrien en détresse» fransýz ánin shyrqady. Saıys erejesi boıynsha birinshi kúni 8 ánshiniń bireýi ketip, 7-eýi qalady. Bir ánshi jeńis kýbogyn jeńip alady. Jeńis kýbogyna jeti ánshini artta qaldyryp, Dımash Qudaıbergenov laıyq dep tanyldy. Dımash Qudaıbergenovtyń menedjeri Alpamys Shárimovtyń málimdeýinshe, búginnen bastap bir top qytaılyq fanat ánshiniń ana tilin túsiný úshin qazaq tili kýrsyna jazylǵan. Al, Qytaılyq mıkroblog Sina Weibo  áleýmettik jelisinde jazylýshylarynyń sany 35 myńnan bir saǵatta 118 myńǵa jetken.

Baıqaýdyń ekinshi kezeńi kelesi senbi kúni ótedi.

10 qańtar kúni Dımash Qytaı kórermeniniń aldyna alǵash ret shyqqan soń, jas ánshi týraly Qytaı baspasózi jaza bastaǵan. Tipti keıbir basylym ony «Dımash – Táńir ózi nazaryna alǵan jas ánshi» dep baǵalaǵan.  

Al, Qytaıdyń jańalyq portaldary men ensıklopedıalyq saıttarynda Dımash Qudaıbergenniń ómirbaıany tolyqqandy jarıalanǵan. 

Qytaılar tipti Dımashtyń kıim úlgisindegi kıimderdi satylymǵa shyǵaryp úlgergen.

Aıta keter bolsaq, atalǵan mýzykalyq baıqaý Qytaıdyń Chansha qalasynda ótip jatyr. Ánshiniń menedjeriniń aıtýynsha, Dımash Qudaıbergenov osy baıqaýǵa qatysatyndyqtan, tipti ımıjin de ózgertken. Menedjerdiń sózinshe bul «Qytaı daýysy» jobasynan da úlken joba.  Atalǵan jobany Qytaıdyń eń iri Hunan TV telearnasy kórsetedi.

Eske salaıyq, Dımash Qudaıbergenov Vıtebskte ótken "Slaván bazary-2015" halyqaralyq baıqaýynda jeńimpaz atanǵan edi. Ol, sonymen qatar, "Shyǵys bazary" jáne "Meıkın Azıa" baıqaýlarynyń Gran-prı ıegeri.