«Nurly jer» baǵdarlamasy boıynsha jyl saıyn turmysy tómen otbasylar úshin 3 myń páter salynady. Sondaı-aq, dárigerler, muǵalimder men memlekettik qyzmetkerler atalǵan baǵdarlama aıasynda páter alýǵa múmkindigi bar. Bul týraly Úkimettiń baspasóz ortalyǵynda ótken brıfıńte Qurylys, turǵyn úı komýnaldyq sharýashylyq isteri jáne jer resýrstaryn basqarý komıtetiniń tóraǵasy Marhabat Jaıymbetov málimdedi, dep habarlaıdy Baq.kz

«Nurly jer» baǵdarlamasy 5 baǵyt boıynsha jumys isteıdi. Baǵdarlama aıasynda beriletin turǵyn úılerdiń sharshy metri arzandatylǵan: 140 myń teńge. Bul basqa óńirler úshin. Al Astana men Almaty qalalarynda bul baǵa 180 myń teńgeni quraıdy. Al, jalpy naryqtaǵy páterdiń bir sharshy metri 260-280 myń teńge. Bul qarapaıym halyq úshin úlken jeńildik», - dedi ol.

Sonymen qatar, M.Jaıymbetov memlekettik baǵdarlama aıasynda salynatyn turǵyn úılerden kimderdiń páter alýǵa múmkindigi bar ekendigine toqtaldy.

«Ol memlekettik qyzmetkerler, dárigerler men muǵalimder, ári turmysy tómen azamattar. Qazirgi tańda 430 myń adam kezekte tur. Bul baǵdarlama turmysy tómen otbasylarǵa qoldaý kórsetýge baǵyttalǵan. Jyl saıyn turmysy tómen otbasylar úshin 3 myń páter salynatyn bolady. Nátıjesinde 15 jyldyń ishinde 45 myń páter salamyz. Bul halyq úshin úlken kómek», - dep atap ótti ol.

Osy oraıda Marhabat Jaıymbetov qarapaıym azamattardyń páterdi qalaı alatyndyǵyn túsindirdi.

«Jalǵa beriletin, biraq satylmaıtyn páterler bolady. Jyl saıyn osy qurylysty júrgizý úshin 25 mlrd teńge qarjy bólinip otyr. Nátıjesinde 3 myń páter salynady. Odan basqa 16-17 myń nesıelik páter salynady. Oǵan kvazımemlekettik sektordaǵy «Samuryq Qazyna» ál-aýqat qory men «Báıterek» holdıńi jaýapty. Olarda 277 mlrd teńge qarjy tur. Osy mekemeler arqyly 15 jyldyń ishinde 280 myń páter paıdalanýǵa beriledi. Bul páterler «Turǵyn úı jınaq banki» arqyly úlestiriledi. Aqshasy 50%-ǵa jetpegenderdiń jeńildetilgen nesıemen páter alýǵa múmkindigi bar», - dedi ol.