Kezdesýge M.Joldasbekov, K.Saǵadıev, R.Shyrdabaev, O.Ábdikárimov, B.İzmuhambetov, M.Qasymbekov qatysty.
Basqosý barysynda konstıtýsıalyq reformalardy talqylaýmen, sondaı-aq aýyl sharýashylyǵy, mal sharýashylyǵy, densaýlyq saqtaý, ǵylym jáne bilim, shaǵyn jáne orta bıznes salalaryn jańǵyrtýmen, júrgizilip jatqan jekeshelendirýmen baılanysty halyq úshin mańyzdy ekonomıkalyq, áleýmettik, qoǵamdyq aýqymdy máseleler talqylandy.
Memleket basshysy táýelsizdiktiń 25 jylynda Qazaqstan kúrdeli jol júrip ótkenin atap ótip, respýblıkamyzdyń odan ári damýynyń negizgi baǵyttaryna qatysty óz oıyn ortaǵa saldy.
– Qazaqstan tanymal elge aınaldy, ekonomıkamyz qarqyndy damyp keledi. Endi «Qazaqstannyń úshinshi jańǵyrýy: jahandyq básekege qabilettilik» atty joldaýda belgilengen maqsattar men mindetterdi iske asyrý úshin qol jetken jetistikterimizdi paıdalana bilý qajet, – dedi Qazaqstan Prezıdenti.
Nursultan Nazarbaev qazaqstandyqtardyń aldynda turǵan zamanaýı syn-qaterlerge nazar aýdardy.
– Naryqtyq qatynastar jolyn tańdaǵan qoǵamymyzdyń aldynda oryndalý tıimdiligi eldiń odan ári damýyna yqpal etetin túbegeıli jańa mindetter tur. Jahandyq ekonomıka dáýirinde ınovasıa kún tártibindegi basty máselege aınaldy. Indýstrıalyq tóńkeris bizdi aınalyp ótpeýge tıis. Biz ekonomıkamyzǵa ınovasıalyq tehnologıalardy engize bilýimiz qajet, – dedi Memleket basshysy.
Sondaı-aq, Qazaqstan Prezıdenti bul maqsattyń júzege asyrylýy tıisti qarjy jumsaýdy qajet etetinin atap ótti.
– Eger ınovasıalyq tehnologıalar ázirleýge qarajat bólmesek, onda bizge álemdik jańa ekonomıkalyq qurylymnyń aýqymynan tys qalý qaýpi tónýi múmkin. Jappaı óndiristi damytý úshin jańashyldyqtar engizý arqyly eńbek ónimdiligin arttyrǵan jón. Buǵan kásiporyndardyń, sondaı-aq eldiń jetekshi joǵary oqý oryndarynyń janynan ǵylymı-zertteý ınstıtýttary qurylyp, olarǵa tıisti qoldaý jasalǵanda ǵana qol jetkizý múmkin bolady. Máselen, mundaı ǵylymı-zertteý ınstıtýttaryn «Alataý» ınovasıalyq tehnologıalar saıabaǵynyń, Nazarbaev Ýnıversıtetiniń janynan qurýǵa múmkindik bar, – dedi Elbasy.
Kezdesýge qatysýshylar Memleket basshysy bastamashy bolǵan, memlekettik bılik tarmaqtary arasynda ókilettikterdi qaıta bólýge baǵyttalǵan reformalardy tolyq qoldaıtyndaryn bildirdi. Bul rette eń aldymen Parlamenttiń ókilettigin keńeıtýge, onyń derbestigi men jaýapkershiligin kúsheıtýge baǵyttalǵan qadamdardyń der kezinde jasalǵany jáne progresıvtiligi atap ótildi.
Buǵan qosa, kezdesýge qatysýshylar respýblıkalyq jáne jergilikti búdjet qarajatynyń jumsalýyna qoǵamdyq baqylaý jasaýǵa, salalyq baǵdarlamalardyń oryndalýyna, jer reformasyna, sybaılas jemqorlyqqa qarsy sanany ornyqtyryp, «múldem tózbeýshilik» saıasatyn tıimdi júzege asyrýǵa, sondaı-aq Bes ınstıtýsıonaldyq reformany iske asyrý boıynsha Ult josparynda belgilengen mindetterdi kezeń-kezeńmen oryndaýǵa qatysty túıtkildi máselelerge toqtaldy.
