Beıbit Orynbekuly QOISHYBAEV, «Ádilet» tarıhı-aǵartý qoǵamy tóraǵasynyń orynbasary, jazýshy, tarıh ǵylymdarynyń kandıdaty.  2017 j. 5 naýryzda Ahmet Baıtursynov mýzeıinde Alash arystaryna berilgen astaǵy sóz:

Búgin ult kósemi Álıhan Bókeıhanovtyń týǵan kúni.

Bul kúni, budan júz jyl buryn, Álekeń Batys maıdanda, soǵystyń qara jumysyndaǵy jigitter arasynda júrgen edi.

Sol jaqta ol aqpan revolúsıasynyń basty nátıjesin – ımperatordyń taqtan túskenin estidi.

Sol jaqta Qazaqtyń da basyna óz shańyraǵyn kóterýin múmkin etetin jańa memlekettik qurylym jasaıtyn Quryltaıshy jınalys shaqyrýǵa naqty jaǵdaı týǵanyn paryqtady. Serikterimen birge alda turǵan mindetterdi talqylap, azattyq tańy atqanyn, bostandyq kúni shyqqanyn, el ishindegi laıyqty azamattardy tańdap, eldik kúreske qosý qajettigin aıtyp, qazaq halqyna jar saldy.

Qazaq ult-azattyq qozǵalysynyń bas qaharmany soqqan dabyldy onyń senimdi úzeńgilesi Ahań – Ahmet Baıtursynov basqaratyn «Qazaq» gazeti shartarapqa taratty.

Sodan bastap azattyq jolyndaǵy kúres jańa mazmunmen tolyqty. Sóıtip,  toǵyz aıdan keıin qazaq avtonomıasy men onyń úkimetin – «Alash-Orda» Halyq Keńesin ómirge ákeldi. Tórt ǵasyr táýelsiz ǵumyr keshken, odan uzaq jyldar boıy otarlyq qamyt turalatqan qazaq memlekettigi tuńǵysh ret Alash-Orda bolyp qaıta jańǵyrdy.

Biz búgin sol uly oqıǵanyń júz jyldyǵy qarsańynda bas qosýdamyz. 

Osy turǵydan qaraǵanda, Alash arystaryna Ahańnyń murajaıynda berilmek búgingi Astyń erekshe sımvoldyq máni bar. Otanshyl jas urpaq uıymdastyryp otyrǵan qazirgi As Alash-Ordanyń alda kele jatqan bir ǵasyrlyq mereıli belesine qalyń jurtshylyq nazaryn aýdarýǵa tıis. Aýdaryp qana qoımaı, toǵyz aıdan keıin merekelenbek osy uly oqıǵany laıyqty atap ótý úshin jan-jaqty daıarlyq jumystaryna kúlli táýelsizdik kúreskerlerin jumyldyrýǵa tıis.

Bizdiń oıymyzsha, ultymyzdyń ar-ojdany atanǵan Ahań meken etken myna ǵımarattyń janynan onyń barsha úzeńgilesteriniń ómiri men qyzmetin, Álekeń basqarǵan Alash-Ordanyń tarıhyn kórneki túrde nasıhattaıtyn mýzeı salynǵany jón bolar edi.

Qoǵamdyq kúshter birikse, jáne, árıne, qala úkimeti tıisti qoldaý kórsetse, osy jazda Alash-Orda murajaıyn salyp alýǵa tolyq múmkindik bar.

Qazir bárimiz Asqa jınalyp otyrǵan osy alańda, Ahańnyń myna mýzeı-úıine úılestire, týra janynan Alash-Orda mýzeıi boı kóterse – ol, sóz joq, júz jyldyqtyń qurmetine turǵyzylǵan tamasha keshendi eskertkish bolady.

Alash-Orda mýzeıi rýhty kóterip, elimizdiń birligi men qýatynyń arta túsýine qyzmet etetin aǵartýshylyq, tarıhı-tanymdyq mán-maǵynasy zor eleýli ǵylymı mekemege aınalady.  

Halqymyzdy budan bir ǵasyr ilgeride ámirshil júıe qyspaǵynan bosatyp, el bolý jolyna bastaǵan Azattyq kúreskerleriniń rýhy barsha qazaqstandyqqa darýyn tileıik. Búgingi Asta eske alynatyn arýaqtar Táýelsizdik týyn alǵa aparýshylardy árdaıym qorǵap, qoldap, jebep júrsin!