Balalar úıinen asyrap alynǵan balaǵa 10 AEK kóleminde (22 myń teńge) aı saıynǵy járdemaqy tólenedi. Jáne anasyna da, ákesine de 41 myń teńgeden (ekeýine 82 myń teńge) aılyq beriledi. Bul týraly Balalardyń quqyqtaryn qorǵaý komıtetiniń bas sarapshysy Gúlmıra Kúlsarıeva Biryńǵaı respýblıkalyq qamqorshylar keńesiniń otyrysyna deıin bergen suqbatynda aıtty, dep jazady «Qamshy» portaly baq.kz saıtyna silteme berip. 

«Balalar úılerinde tárbıelenýshiler sanyn azaıtý jumysy júrgizilip jatyr. Mysaly, 1 qańtardan bastap, elimizde «Qabyldaýshy otbasy» degen jańa ereje qabyldandy. Ol boıynsha balalar úıinen asyrap alynǵan balaǵa 10 AEK kóleminde (22 myń teńge) aı saıynǵy járdemaqy tólenedi. Jáne anasyna da, ákesine de 41 myń teńgeden (ekeýine 82 myń teńge) aılyq beriledi. Bul járdemaqylar 18 jasqa tolǵansha tólenip turady. Buǵan qosa ákesi de, anasy da jumys isteı alady», - dedi G.Kúlsarıeva.

Sondaı-aq, mamannyń aıtýynsha, balalardyń oqyp jatqan mektebinde tegin ystyq tamaq alý, jaz mezgilinde demalysqa barý, mektep aldynda kıim-keshek pen kerek-jaraq alý múmkindigi bar.

«Bul jerde, otbasynyń tórtten on balaǵa deıin asyrap alý múmkindigi bar. Tórtten kem, onnan artyq balany alýǵa bolmaıdy, ıaǵnı óz balalaryn qosqanda barlyǵy kámeletke tolmaǵan on bala bolýy kerek. Al aılyq sol qalpynda qalady», - dedi G.Kúlsarıeva.

Maman keıde balalardy keri qaıtarý oqıǵalarynyń da kezdesetinin aıtty. Onyń aıtýynsha, buǵan bala asyraıtyn otbasylardyń daıyn bolmaýy sebep. «Týǵan balańmen qalaı til tabysasyń, ár balamen solaı til tabysýǵa tyrysý kerek» deıdi bas sarapshy.

Atap ótsek, buǵan deıin maman jetimder sany boıynsha Qaraǵandy oblysynyń kósh bastap turǵanyn habarlaǵan bolatyn.