Almatyda er adam dúkenderdiń birinen kúmándi kúrish satyp alǵan. Birtúrli daqyldyń vıdeosyn er adam Tengrinews.kz redaksıasyna jibergen. 

Onyń aıtýynsha, azyq 8 naýryzda "Qazaqfılm" yqshamaýdanyndaǵy qalalyq kishigirim dúkenderdiń birinen alynǵan. 

«Sórede birneshe paket jatty, syrtqy qabaty ádemi, táp-táýir kúrish bolatyn. Keshe qaınataıyn dep, jýdym, sol kezde baıqaǵanym, kúrishtiń túsi ózgerip ketti, jartylaı aq, jartylaı seldir bola tústi. Bes mınýttan soń barlyǵy appaq boldy. Men kúrishti qolyma alyp, ezgenimde ol untaqtalyp ketti», - deıdi Vladımır.

Almaty turǵyny Qytaıdyń plasık kúrishin satyp aldym degen oıda. Ol kúmándi daqyldy jeýden bas tartqan. Satyp alǵan zatyn qoqysqa tastapty.

«Almatylyqtarǵa eskertkim keledi, kúrish satyp alǵanda abaı bolyńyzdar. Men mundaımen alǵash ret kezdesip otyrmyn, jaǵymsyz jaıt», - dedi er adam.

Osyǵan deıin BAQ ókilderi, Qytaıda qoldan jasalǵan kúrishtiń paıda bolǵanyn jazǵan. Ol kartoptan jáne plasmassadan jasalatyn kórinedi. Mamandar qoldan jasalǵan kúrishtiń adam densaýlyǵyna zıan ekenin aıtady. Ony paıdalanǵan jaǵdaıda adamdar qaıtys bolýy da múmkin.

Qoldan jasalǵan kúrishtiń Ońtústik-SHyǵys Azıa elderinde taralǵany habarlandy. Qazaqstanǵa plasık kúrishtiń kirgeni týraly resmı málimet joq.