Qazaq tiliniń qoǵamdaǵy statýsy jaıly burynnan beri aıtylyp keledi. Bul jaýyr bolǵan taqyryp bolǵanymen, mańyzdylyǵyn joımaǵan jáne sheshimin tappaǵan másele dep jazady qamshy.kz.

Qazaqstanda ómir súrip jatqan ózge ult ókilderiniń memlekettik tildi áli kúnge deıin úırene almaı júrgenin synǵa alǵan pikirler jıi aıtylatyn boldy. Solardyń birnesheýin nazarlaryńyzǵa usynamyz.

«Qazaq tilin úırený qıyn deıtinder óz erinshektigin aqtap alǵysy keletinder. Osy rette bir oqıǵa esime túsip otyr. 10 jyl buryn shańǵy tebýge bardyq. Bizben birge Qazaqstandaǵy Fransıa elshiliginde jumys isteıtin fransýz ultynyń qyzy da bardy.  Keshkisin biz káýap jasap, ot jaǵyp, áńgimelesip otyrdyq. Fransýz qyzy orys tilin bilse de tek qazaq tilinde sóıledi.  Qazaqstanda turyp qazaq tilinde sóılegen durys dep sheshse kerek. Fransýz áıeliniń Qazaqstanda turǵanyna bir jyl ǵana bolǵan. Osy ýaqyt aralyǵynda ol qazaq tilin erkin meńgergen eken. Osydan suraq týyndaıdy. Sheteldikterge qazaq tilin úırený ońaı da, al osy elde turyp jatqan bizge nelikten qıyn bolýy kerek? Sonda sheteldikter aqyldy da, biz topaspyz ba?» dep saýal joldady Facebook qoldanýshysy Janna Ilchına.

Al Vácheslav Popov esimdi azamat qazaqtardyń kezinde ata-babalaryn jyly qabyldap, ekinshi dúnıejúzilik soǵys kezinde tamaǵymen bóliskenine rızashylyq retinde qazaq tilin úırenýge bel býǵan.

«Qazaq tilin úırenemin dep naqty sheshim qabyldadym! KSRO kezinde týyldym, ınternatta qazaq tilin durys úıretpedi, odan keıin mektepte de sabaq óz deńgeıin ótkizilmedi dep syltaý aıtpaımyn.  Sebebi qazaq tilin bilmegenim tek qana meniń kinám. Naqtyraq aıtqanda jaýapkershiliktiń joqtyǵy. Men ózim qazaq tilin oqymadym, úırengim kelmedi, qajet dep tappadym, qoryqtym!  Ózime, qazaqtarǵa, orystarǵa jáne Qazaqstanda turatyn barlyq ult ókilderine dáleldeý úshin, óz dástúrińdi, mádenıetińdi syılaıtyn bolsań, halyqtar dostyǵyn qoldaǵyń kelse, sonaý 1927 jyly Túrksıb qurylysy bastalǵanda meniń ýkraın jáne evreı ata-babalarymdy qushaq jaıa qarsy alǵan odan keıin 1941-1945 soǵys jyldarynda olardy tamaqtandyryp, fashızmge qarsy kúresken qazaqtardyń  ana tilin úırenemin dep sheshtim. Men jáne meniń otbasym osy jerde beıbitshilikte, tynyshtyqta ómir súrýge múmkindik aldyq.  Osy kórsetilgen qurmetke jaýap retinde 6 aıdyń ishinde qazaq tilinde erkin sóılep, onyń klasıkalyq ádebıetin oqyp, tereńnen túsinetin jaǵdaıǵa jetetin dárejede úırenemin.

Biz baýyrlarmyz! Bizdiń qanymyz bir! Bir iske birge kirisemiz!» dep jazady Vácheslav Popov.