Parlament Májilisiniń depýtaty Baqytgúl Hamenova Qazaqstanda bebı-boks engizý bastamasyn qaıta usyndy, dep xabarlaıdy QazAqparat.
Úkimet basshysy Baqytjan Saǵyntaevqa joldaǵan depýtattyq saýalda Hamenova jańa týǵan nárestelerdiń qoqys jáshiginen jıi tabylyp jatqanyna úlken alańdaýshylyq bildirdi.
«Bas prokýratýranyń málimetteri boıynsha, 2016 jyly Qylmystyq kodekstiń 119 baby "balany qaýipti jaǵdaılarda qaldyryp ketý" faktisi boıynsha ishki ister organdary 15 is qozǵady. 2017 jyldyń 3 aıynda 8 oqıǵa tirkeldi. Ókinishke qaraı, mundaı oqıǵalar ósip jatyr. Qyzdar urpaq jalǵastyrýy tıis. Qyzdarymyzdyń tárbıe-ónegesi - bolashaq býynnyń taǵdyry», - dedi ol Májilistiń plenarlyq otyrysynda.
Osy turǵyda xalyq qalaýlysy oqý oryndarynda jas qyzdardyń rýxanı damýyna den qoıý qajettigin atap ótti. «Keıbir elderle "úmit besigi" - bebı-boks degen bar. Áıelder isi jáne otbasy-demografıalyq saıasat jónindegi ulttyq komısıa jáne qoǵamdyq uıymdarǵa kúsh biriktiretin ýaqyt jetti. Osyndaı "úmit besikteri" kóptegen batys elderinde medısınalyq mekemelerdiń janynda ornatylady. Osylaısha, myńdaǵan náresteniń ómirine arasha boldy. Atalmysh bokstardy ornatý oryn alǵan jaǵdaıdy sheshe alar edi», - dedi ol.
