Meniń kópten beri sheshilmeı kele jatqan máselem bar edi. Bul másele meniń ǵana emes, men turatyn Ońtústik Qazaqstan oblysy, Saıram aýdany, Mankent aýyly turǵyndarynyń da máselesi dep aıtsa bolady.

Iaǵnı, atap aıtar bolsam aı saıyn paıdalanylatyn gaz túbirtekterine kórsetilmegen tehnıkalyq qyzmetterdiń aqysyn qosa jazyp jibergennen bastaldy.

Atalǵan túbirtekke sáıkes paıdalanylǵan gazdy tóleýge «Qazposhta» AQ bólimshesine barǵanymyzda, bólimshe qyzmetkerleri túbirtekte kórsetilgen somany tolyq tólegen jaǵdaıda ǵana qabyldaı alatyndyǵyn túsindirdi.

Alaıda, biz kórsetilmegen tehnıkalyq qyzmetter úshin túbirtekte kórsetilgen somany tólemeımiz dep «Zenıt TVK» JSHS-ne barǵanymyzda, basshylary ne jaýapty qyzmetkerleri tarapynan tolyqqandy jaýap ala almadyq.

Men, aýyl turǵyndarynyń atynan osy máseleni kóterip, sheshimin taýyp beredi degen úmitpen Qazaqstan Respýblıkasy memlekettik qyzmet isteri jáne sybaılas jemqorlyqqa qarsy is-qımyl Agenttiginiń Ońtústik Qazaqstan oblysy boıynsha departamentiniń basshysy Á.Kómekbaevtyń jeke qabyldaýynda boldym.

Departament basshysy orynbasarlarymen basqarma basshylaryn jáne «Zenıt TVK» JSHS-niń ókilin qatystyra otyryp, shaǵymymdy tyńdady.

«Zenıt TVK» JSHS-niń ókili aldaǵy ýaqytta atalǵan máseleni sheshý úshin, árbir turǵynmen jeke kelisim-shart jasaý jumystaryn júrgizip, tehnıkalyq qyzmetterdi kórsetý aktisin túzgennen keıin ǵana tólem túbirtegine kórsetilgen somany qosatynyn aıtty.

Osylaısha tek meniń ǵana emes, búkil aýyl turǵyndarynyń máselesin sheship bergen Departament basshylyǵy men ujymyna alǵysym sheksiz.

Departament basshylyǵy men ujymyna aldaǵy ýaqyttarda halyq qamyn oılap, el arasynda halyqtyń muń-muqtajyna kóńil bólip, máselelerdi sheshý úshin barlyq jaqsylyqtardy tileımin.

         Hýdaıbergen Tadjıbaev, Ońtústik Qazaqstan oblysy, Saıram aýdany, Mankent aýyly kóshe komıtetiniń tóraǵasy