Qorǵanys mınıstrligi 27-shi naýryzdan kóktemgi áskerge  shaqyrý naýqanyn bastady. Al, Qarýly kúshter sapynda otan aldyndaǵy boryshyn ótegisi keletinderdiń sany óte kóp. Sondyqtan synaq ta barynsha qatańdatylǵan. Bul týraly KTK jańalyqtary habarlaıdy.

Qazir jer-jerdegi qorǵanys basqarmalarynda qyzý qarbalas. 18 ben 27 jas aralyǵyndaǵy jigitter jappaı kommısarıatqa shaqyrtylyp, medısınalyq tekseristen ótip jatyr. Qarý ustap, kazarma kórgisi keletinderdiń kóptigi sonshalyq, 1 orynǵa 4 adam talasýda. Biraq eń myqtylary ǵana qarýly kúshter sapyna alynbaq.

Amantaı Óserbaev, QR QM Uıymdastyrý-jumyldyrý departamenti basshysynyń orynbasary:

-Densaýlyqtary jaqsy, bilimi bar, psıhologıa jaǵynan daıyn jigitterdi  iriktep, merzimdik áskerı qyzmetke jiberimiz. Osy kóktemde qarýly kúshterdiń qataryna 16 myńdaı azamat áskerı qyzmetke shaqyrtylady.

Iaǵnı, úmitker kóp bolǵandyqtan talap qatal. Dárigerlerdiń tekserisi men psıhologıalyq testten bólek, bolashaq sarbazdardyń dinı ustanymyna da muqıat mán beriledi. Ony anyqtaý úshin Ulttyq qaýipsizdik komıteti tartylady eken. Al, barlyq synnan súrinbeı ótkenderdiń teń jartysy Qorǵanys mınıstrliginiń bólimderine, qalǵany Ulttyq gvardıa men İshki Ásker jáne shekara shebine attanady.

Músilim Daıyrov, QR QM Uıymdastyrý-jumyldyrý departamentiniń basshysy:

-Jyldan jylǵa talap kúsheıip keledi. Sáıkesinshe, sarbazdardyń kásibı deńgeıi joǵary. Ári olardy áskerge shaqyrǵanda mamandyǵy men qandaı qabileti baryn eskerip, soǵan saı jumys beremiz.

Alaıda áskerdegi álimjettik, sýısıd tyıylmaı tur. Bıyldyń ózinde bólimderde 100-ge jýyq qylmys bolyp, sonyń birazy jaýyngerlerdi uryp soqqandarǵa qatysty qozǵalypty. Al, mundaı derekterdi boldyrmaý úshin sarbazdarǵa ózi turyp jatqan qalada qyzmet etýge múmkindik berý máselesi aıtylǵan. Biraq, úıinen jyraqta bolý jaýyngerlerdiń tózimdiligin shyńdaıtynyn aıtqan ofıserler buǵan búgin qarsylyǵyn bildirdi. Budan bylaı otan aldyndaǵy boryshyn óteýden bas tartqandar bir jylǵa túrmege de qamalýy múmkin. Nemese bir mıllıon teńge aıyppul tóleıdi.