Qazaqstanda patrıot az ba, bári de «patrıot». Bireýi sózimen patrıot, bireýi ásheıin syrt kózge patrıot, endi bireýi aqsha bar jerde ǵana patrıot. Tipti, keıbiri egjeı-tegjeıine kóz júgirtpesten áreket qylady. Osyndaı bir ala qyzba, alyp ushpa «patrıottarǵa» bıyldyń sáýir aıynda kýá bolǵanbyz. «AŃYZ ADAM» jýrnalynyń Ekinshi dúnıejúzilik soǵys qasiretine arnalǵan sany shyǵar-shyqpastan, jýrnal betindegi Gıtlerdiń sýretine bola, esh oqymaǵan bolsa da jýrnal órteý aksıasyn ótkizgen Kım Serikbav, Sergeı Pashevıch, Murat Abdishúkirov bastaǵan bir top Aýǵan soǵysy ardagerleriniń áreketi qalyń jurtty tańǵaldyryp edi. «AŃYZ ADAM» týraly áńgime óz aldyna. Al, men sol keýdesine medal taqqan adamdardyń áreketin esh túsine almaǵan edim, sirá olardyń isi erekshe bir «patrıottyq» úlgisi bolar. Jýrnal ıesi Jarylqap Qalybaıdy sottan sotqa súırep júrip, jýrnaldyń daýǵa qalǵan sanyn tárkileýge tórt aı ýaqyt jumsaǵan quzyrly oryndardyń isin olar jýrnal shyǵyp, úsh kún ótpesten –aq atqaryp tastapty. Bular el basyna qandaı da bir qaýip tónse aldymen uran salady dep bilgem, qaıdam, jańylyppyn, soltústiktegi kórshi eldiń Prezıdenti Pýtın «Qazaqtarda eshqashan memleket bolmaǵan» dep aıtqanyna eki apta ýaqyt boldy, jýrnal órtegish «patrıottarym» Pýtınnyń sýretin órteı me dep eleńdeımin, áli kórinbeıdi...
Qalyń jurttyń esinde bolsa, 21 sáýirde Almaty qalasy, 28 Panfılovshylar parkinde Panfılovtyń nemeresi Aıgúl Baıkadamova da qatysqan bir top Aýǵan soǵysy ardagerleriniń jýrnal órteý aksıasy ótti. Bul 18 sáýirde shyqqan «AŃYZ ADAM» jýrnalynyń kezekti sanyna baılanysty elimizge Reseı jibergen resmı notadan keıin bolǵan oqıǵa. Olar esh oqymastan jýrnal órtep, «Sovet odaǵyna fashıser tıispesin!», - dep uran salǵan edi. Jýrnal órteý aksıasyna NKVD formasyn kıip kelgen Sergeı Pashevıch jýrnaldy NKVD naızasyna shanshyǵan, al, qalǵan soǵys ardagerleri jýrnaldy órtep jiberip, kúlin de qaldyrmaı aıaqqa taptap ketken bolatyn.
Al, myna vıdeoda Gıtler týraly qarama-qaıshy pikirlerdi basyp, ony adamzat qasireti dep ataǵan «AŃYZ ADAM» jýrnalyn Dáýlet Qarabekov esimdi Aýǵan soǵysy ardageri tap-taza provokasıa deıdi, biraq «Qazaqtarda memleket bolmaǵan», - dep, tutas bir halyqty arandatqan Pýtınnyń sózine bir aýyz ýáj aıta qoıǵan joq.
Ýkraınanyń tutastyǵyna qol suǵyp, Qyrymdy tartyp alǵan Pýtınnyń isin oń baǵalap, beıbit zamanda NKVD formasyn kıip taırańdap júrgen Pashevıchter ózi ǵumyr keship jatqan memlekettiń tarıhta memlekettigi bolmaǵany týraly sózge esh mán bermeıtini túsinikti de shyǵar. Alaıda, sol jýrnaldy órteýge barǵan ózge azamattar baǵzy zamandardan Altaı-Atyraý arasyn atyn aýyzdyqpen sýǵaryp, tolarsaqtan qan keship qorǵaǵan batyr qazaqtyń urpaqtary edi ǵoı. Pýtınge lám deı almaı, Jirınovskııdi syrttaı ǵana jelkelegen bir-eki depýtat bolmasa, ne bir áskerı shendi, ne bir qoǵam qaıratkeri tutas qazaqty qorlaǵan Reseı Prezıdentine qaratyp resmı málimdeme jasaı alǵan joq. Iá, shynynda da bizde namysyn jatqa taptatyp qoıǵan memleket eshqashan bolmaǵan da shyǵar...
Nurǵalı Nurtaı
