Parlament Senatynyń depýtaty Sársenbaı Eńsegenov Qazaqstandaǵy ánshilerge fonogramny qoldanýǵa tyıym salýdy usyndy, - dep habarlaıdy Tengrinews.kz

"Halyqpen kezdesý barysynda konsertte fonogramny qoldanýǵa qatysty máseleler qozǵalady. Árıne, biz ártis emespiz, ánshi emespiz, bul máseleni túsinbeýimiz múmkin. Biraq Túrikmenstanda jáne basqa da kórshi elderde fonogrammen án aıtýǵa tyıym salynǵan", - dedi depýtat Eńsegenov.

"Ánshi konsertke kelgende, ol óziniń qyzmetin satady. Al kórermender, ıaǵnı, tutynýshylar oǵan osy konsertti kórý úshin tóleıdi. Osy jaǵynan alyp qarasaq, tutynýshy jaqsy qyzmet túrine ıe bolýy kerek. Sol adamnyń ánin fonorgamma, magnıtofon, dısk, nemese kasseta satyp alyp, tyńdaýǵa bolady. Osyǵan baılanysty halyq bylaı dep jatady: biz konsertterge ártisti kórip qaıtý úshin ǵana barmaımyz ǵoı, biz onyń daýsyn tyńdaımyz, ánin qalaı oryndaǵanyn kóremiz, bizge onyń fonogramsynyń ne qajeti bar", - dedi senator.

Sondaı-aq, depýtat mınıstrden zań jobasyna ózgerister engizýdi qarastyrýdy surady.

"Qural-jabdyqtar men aspaptar jetispeıdi dep jatady. Biraq bir kezderi ártisterimiz fonogramsyz da tiri daýysta án aıtty ǵoı, sondyqtan máseleni sheshý kerek. Bul ártistiń qanshalyqty daryndy ekenin kórsetedi. Sondyqtan, ótinishim, zańǵa ózgeris engizińizshi", - dedi Eńsegenov.