2018 jyldan bastap Qazaqstandaǵy barlyq jetimder úıi qıyn jaǵdaıda qalǵan otbasylar men balalardy qoldaý ortalyqtaryna aınalady, dep xabarlaıdy QazAqparat.
Ortalyqtar ata-ananyń qamqorlyǵynsyz qalǵan balalar keleshek otbasyn tapqanǵa deıin panalaıtyn ýaqytsha oryn retinde qarastyrylmaq.
«Otbasylardy qoldaý ortalyqtarynda balalar januıaǵa qaıta oralǵanǵa deıin bolady. Onda balalar úıiniń tárbıelenýshileri bolmaıdy. Balalar tek belgili bir ýaqytqa, olardyń qujattary rásimdelip bitkenshe, asyrap alýshylar qujattaryn rettep jatqanǵa deıin qalady», - dedi QR Bilim jáne ǵylym mınıstrligi balalar quqyǵyn qorǵaý komıtetiniń tóraǵasy Erjan Ersaıynov balalar úılerin transformasıalaýǵa arnalǵan jıynda.
«Ortalyqtar arqyly bala asyrap alýǵa qulyqty ata-analarmen psıxologıalyq daıyndyq sabaqtary, sonymen qatar jetim balalardy qazaqstandyq otbasylarǵa ornalastyrý jumystary júrgiziledi. Bizde balany qaıtadan balalar úıine tapsyrý oqıǵalary jıi kezdesedi. Bunyń barlyǵy psıxologıalyq daıyndyqtyń joqtyǵynan», - dep atap ótti ol.
Komıtet málimetteri boıynsha, balany qaıta tapsyrý oqıǵalarynyń úlesi 16 paıyzdy quraıdy. Jalpy balalar úılerindegi jetkinshekter sany jyl saıyn 1 myńǵa azaıyp keledi. Jańa otbasyn taýyp jatqan balalardyń sany artýda. Byltyr Astana men Almaty qalalarynda synaq retinde ashylǵan Otbasyn qoldaý ortalyqtary óz nátıjesin bere bastaǵan.
«Qazir endi osy ortalyqtardy ózge de balalar úılerinde ashýdy kózdep otyrmyz. Biz onyń zańnamalyq jaǵyn retteý boıynsha jumysty bastadyq. Kelesi jyldan bastap bul tájirıbeni respýblıka boıynsha engizemiz. Osyndaı ortalyqtar ashylsa, Qazaqstanda jetimder úıi bolmaıdy», - dedi E.Ersaıynov.
