Búgin Senatta otandyq kınolardaǵy tósek qatynasy sóz boldy. «Mádenıet týraly» zań jobasyn talqylaýǵa qatysqan ataqty akter Asanáli Áshimov kórkem fılmderdegi jynystyq qatynas jaıly qoıylymdarǵa qarsy shyqty. Halyq ártisi tipti, er men áıeldiń arasyndaǵy anaıy baılanysty ashyq kórsetken rejıserlerdi zańmen jazalaýdy usyndy. Al, depýtattar fonogrammen án salyp, jurtty aldap júrgen ánshilerdi de jaýapqa tartýdy surap otyr, dep habarlaıdy Ktk arnasy.

Qazaq kınosynyń aqsaqaly Asanáli Áshimov sońǵy kezde otbasymen birge otyryp otandyq kınony kórýden qalypty. Óıtkeni, tósekte alysqan er men áıeldiń jynystyq qatynasy ashyq nasıhattalatyn bolǵan. Áıgili akter bul arsyzdyqty toqtatý úshin senatorlardan arasha surap otyr. Sondyqtan Áshimov seksti kórsetýge zańmen tyıym salý kerek deıdi.

Asanáli Áshimov, KSRO Halyq ártisi:

-"Qyzdy aınaldyrý –  óner,  tósekke jatý –  ómir!" Rejıserlar sonyń ortasyn kórsetedi. Aǵaıyndaryńmen kórip otyryp yńǵaısyz jaǵdaıǵa qalasyń. Osyny zańmen tyısaq jaqsy bolar edi.  

Al Mádenıet mınıstrin ekrandaǵy anaıylyqtan buryn, «Fenıks» pen «Qyzǵylt qoıan» fılmderine bólingen qarjynyń bosqa rásýa bolǵany  qynjyltady. Olardyń ornyna tarıhı týyndylar túsirý kerek edi dep Muhamedıuly ókinip otyr.

Arystanbek Muhamedıuly, QR Mádenıet jáne sport mınıstri:

-Mıfke negizdelgen qaıdaǵy bir «Fenıks» degen fılmdi túsirdik. Qazir olar qaıda qaldy? Bar aqshany urlap ketti. «Rozovyı zaıchık» te halyqtyń qarjysyna túsirilgen edi.

Daý týdyrǵan «Fenıkstiń» rejıseri Tuńǵyshbaı Jamanqulov bolatyn. Akter qazir osy fılmge bólingen mıllıondardy jymqyrdy degen kúdikpen úıqamaqta otyr. Sondaı-aq, Senatta fonogrammen án salyp, jurtty aldap aqsha taýyp júrgen ánshiler jaıly da sóz boldy. Depýtattar  myńdaǵan kórermendi jınap alyp, ótirik aýzyn jybyrlatyp konsert ótkizetin juldyzdardy shetinen jaýapqa tartýdy usyndy.  

Sársenbek Eńsegenov, Senat depýtaty:

-Konsertke kelgen óner ıesi ol qyzmetin satady. Kórermen tutynýshy. Aqshasyn tólep kelgen tutynýshy. Eger osy qarym-qatynasta qaraıtyn bolsaq, tutynýshy sapaly qyzmet alýy kerek. Árıne, ánshilerimiz aıtýy múmkin, keıbir konsert qoıatyn jerlerdiń sapasy kelmeıdi, dybys qalpy buzylady dep. Biraq buryndary da án aıtyp júrdi ǵoı.

Al Mádenıet mınıstri fonogrammen kúrsý úshin aldymen, án keshterin uıymdastyratyn kompanıalardy lısenzıalaý qajet deıdi. Sonda kórermen ártisterdiń tek jandy daýyspen óner kórsetýin talap ete alady eken.

Biraq «Mádenıet týraly» zań jobasynda fonnogrammaǵa tyıym salý týraly bir aýyz sóz joq. Osyǵan qaraǵanda senatorlardyń bul usynysy jerde qalatyn sıaqty. Al qujat kúshine ense, jazýshylardy jarylqap, qalamaqysyn kóbeıtkeli tur. Sonymen qatar, jańa zań boıynsha, endi rejıserler ózi túsirgen ár fılmniń mazmunyna basymen  jaýap beredi. Jáne olardan kınoǵa kásibı akterlerdi shaqyrý  da talap etilmek.