Ótken juma kúni Qazaqstan Respýblıkasy Premer-Mınıstriniń orynbasary – Aýyl sharýashylyǵy mınıstri Asqar Myrzahmetov bastaǵan Qazaqstan delegasıasynyń Qytaı Halyq Respýblıkasyndaǵy QHR Sapany qadaǵalaý, ınspeksıa jáne karantın jónindegi bas basqarmasynyń tóraǵasy Chjı Shýpınmen alǵashqy kezdesýi bolyp ótti, dep jazdy egemen.kz Úkimettiń baspasóz qyzmetine silteme jasap.
Kezdesý barysynda taraptar Qazaqstannyń aýyl sharýashylyǵy ónimderiniń Qytaı naryǵyna kirýi men shekteýlerdi joıý máseleleriniń birqataryn talqylady. Atap aıtqanda, Qytaı tarapy QHR-dyń jetkizýshi kompanıalar tizilimine engizý úshin bıyl sáýirde qoı eti óndirisiniń júıesin jáne et óńdeýshi kásiporyndardy tekseretinin rastady. Eki jaq ta Qazaqstannan Qytaıǵa eksporttalatyn 34 ónimge qatysty veterınarlyq jáne fıtosanıtarlyq talaptar Hattamalary jobalaryn kelisimdeý úderisin jyldamdatatyn boldy.
Sondaı-aq, Qazaqstan tarapy el aýmaǵynda aýyl sharýashylyǵy ónimderiniń sapasy men qaýipsizdigin baqylaýǵa arnalǵan birikken zerthana qurý jáne ony tirkeý bastamasyn kóterdi. Aıta keteıik, kezdesý qorytyndysy boıynsha kórshiles elge eksporttalatyn bıdaı kebegi partıalaryna qoıylatyn tekseris, karantın jáne sanıtarlyq talaptar týraly Hattamaǵa qol qoıyldy. Atalǵan kelisimniń arqasynda qazaqstandyq bıznesmender tuńǵysh ret Qytaı naryǵyna bıdaı kebegin eksporttaý múmkindigine ıe bolady jáne de bul úrdisti alǵashqylardyń biri bolyp júzege asyrý múmkindigi «Huoerguosi Irbis International Trading Co LTD» kompanıasynyń úlesine tıip otyr.
Óz kezeginde, kompanıanyń bas dırektory Marat Dáýletqalıev osyndaı tıimdi sheshimderdiń astyq eksportyna serpin beretinin ataı otyryp, syndarly kelisim úshin kásipkerler atynan Qazaqstan Úkimetine alǵys bildirdi.
