Shahandaǵy ot jaǵýshy Meırambek Jıenbaevtyń denesi aýyl mańyndaǵy daladan tabyldy, - dep habarlaıdy Tengrinews.kz

Shahan turǵyndary er adamnyń denesin kezdeısoq kórip qalǵan. Denesi aýyldan 700 metr jerde qaraýsyz qalǵan saıajaıdan tabylǵan. Er adam buzylǵan úıdiń shuńqyrynda jatqan.

"Oǵan eshkim zorlyq kórsetpegen. Er adam keıin úsip qalǵan bolýy múmkin", - dedi Shahan İİB basshysy Dýman Kojahmetov. - Onyń áıeli kúıeýin tanydy. Saraptama taǵaıyndaldy, tergeý júrgizilip jatyr".

Eske sala keteıik, 1 qańtarda Shahtınsk qalasyndaǵy Shahan aýylynda keshki ýaqytta turǵyn úıdiń bir bóligi opyrylyp, 9 adam qaza tapqan bolatyn. Olardyń úsheýi er adam, úsheýi áıel, taǵy úsheýi balalar eken. Al keıin apattyń aldyn ala sebebi atalǵan edi. 

Sondaı-aq, osyǵan deıin Shahan aýylynda úıdiń qulaýynan qaza tapqandardyń otbasyna mıllıon teńgeden bólinetini habarlanǵan bolatyn. "Otbasylaryna qarjylaı kómek kórsetý jaıynda. Ákimdik qaza tapqan ár adam úshin mıllıon teńgeden jáne 500 myń teńge aýrýhanada jatqan zardap shekkenderge bóledi. Sonymen qatar ákimdik qaza bolǵandardy jerleý rásimin jáne eske alýdy óz moınyna alady", - degen edi oblystyq ákimdiktiń baspasóz qyzmetindegiler.

Al 4 qańtarda Shahan kentinde tótenshe jaǵdaıdan qaza tapqandar jer qoınyna tapsyrylǵan bolatyn.