Almaty oblysy Qarasaı aýdanyndaǵy turǵyn úılerdiń birinen 11-shi synypta oqıtyn qyzdyń óli denesi tabyldy, dep habarlaıdy 31 arna.

 Qaskóıdiń jeke tulǵasyn anyqtaǵan tártip saqshylary 35 jastaǵy kúdiktini ustady. Aıýandyq árekettiń qurbany bolǵan órimdeı jas qyzdyń qandaı jaǵdaıda kóz jumǵanyn kórshileri de, jaqyn mańdaǵylar da bilmegen. Buǵan deıin qaıtys bolǵan qyz ben kúdikti týys bolýy múmkin degen aqparat taraǵan.

Dál Almaty irgesindegi «Asyl arman» kesheninen maza qashqan. 19-úıdiń aldynda qaptaǵan polıseı. Eki kún buryn altynshy qabattaǵy páterlerdiń birinen jas qyzdyń óli denesi tabylǵan. Jaqyndary men óz ómirleri úshin alańdaǵan turǵyndar sumdyq oqıǵadan keıin seskenip qalǵan. Mundaǵy turǵyndardyń basym bóligi páterdi jaldap turady. Qaıǵyly jaǵdaı oryn alǵan páterdiń ıeleri de jaldap turǵan eken. «Asyl arman» TK turǵyndarynyń aıtýynsha, qabyrǵa juqa, biraq sol kúni eshkim eshteńe estimegen.

Kýágerlerdiń aıtýynsha, bul páterde kimderdiń turatynyn, qaıtys bolǵan qyzdyń kim ekenin eshkim bilmeıdi. Aldyn ala aqparat boıynsha 2000 jyly týǵan qyz týystaryna kóktemgi demalysqa kelgen. 

Jergilikti turǵyn, 1982 jylǵy azamat adam ólimine qatysy bar degen kúdikpen ustaldy. Qazir ol Qarasaı aýdandyq ishki ister basqarmasyna jetkizilip, tergeý amaldary jalǵastyrylýda.  

Qamaýǵa alynǵan kúdiktiniń zorlaý deregine qatysy bar joǵyn anyqtaıtyn qosymsha saraptamalar da taǵaıyndalǵan. Naqtylanbaǵan aqparat boıynsha qyz óz jezdesiniń qolynan qaza bolýy múmkin.