Nur saýlaǵan gaýhar tastaı qarashyqtan nur emes, mólt-mólt etip jas tamsa; eljiregen et júregiń qan jylap, qan kepkesin qatqan qara tas bolsa; bodandyq pen kemdiktiń, bostandyq pen teńdiktiń, aqıqatynda, maǵynasy bos bolsa; qý tirlikti súrgeniń – toǵyz aýyz tobasyz sózben, toǵyz túıege júk bolar baılyqpen, toǵyz gram qorǵasynmen ǵana rastalsa – sonda shyndyqty qaıdan tabamyz?!

Ózimizde bar nárseni ózimizge qımasaq; ýaqyt pen keńistikti noqtalaıtyn qý kóńil mezgilinen jańylyp, shekti qoıyp, qara jer men kók aspannyń aıasyna syımasa; bireýdiń nadandyǵy men toqshylyǵy da, bireýdiń jamandyǵy men joqshylyǵy da, aınalyp kelgende, qara halyqty ǵana qınasa; azýy bary – azýlymyn eken dep aıylyn jımasa, quryǵy uzyny – quryqtymyn eken dep qulqynyn tımasa – sonda táýbeni qaıdan tabamyz?!

Din, dil deımiz, til deımiz... Dindaryń kim? Din qaıda? Dilmaryń kim? Dil qaıda? Tilemsek kim? Til qaıda? Shaǵystyryp otty sýǵa, jerdi – kókke, kúndi – aıǵa, bar ilimdi oıbotqa qyp, joq ilimdi oılap taýyp, áıteýir, qoıyrtpaqtap keltiremiz yńǵaıǵa. Kóz de, sóz de, kókirek te Allaǵa emes adamǵa qul mundaıda – sonda ımandy qaıdan tabamyz?!

Birlik qaıda? Bar ma, birlik, oı baqsaq: batys, shyǵys, ońtústik bop, jeke-jeke aımaq sap; jaqsy menen jaısańyńdy bir-birine aıdap sap; rýyńmen dep ý ishkizip, óziń zámzám sý iship; shatyrdaǵy oryn úshin shaıtanmen de týysyp, ıtimen ań qýysyp, ıtaıaǵyn jýysyp, sosyn kelip kisimsiný qaı maqsat?!

Tirlik qaıda? Shyndyq – jalǵan; táýbe – qalǵan; birlik – arman; ıman – joq. Japa shekken aǵaıynnyń aıtqanyna uıyǵan bop, reti kelse solarmen, qyshqyldatyp sharap jutyp, ystyq-ystyq sháı iship; «saıasat» dep, «mádenıet» dep qabyrǵamyz qaıysyp, óp-ótirik otyramyz maıysyp...

Al jaı kúni qysyr sóz ben qur uıqydan bas almaı; janǵa paıda ákelmeıtin shúkirlikten asa almaı; bireý qyzmet jasardaı; bireý jambas asardaı; bireý quman tosardaı, kergımiz kep, sorǵa bitken qısyq aǵash sekildi. Sen be, jalǵyz kekildi? Men be, jalǵyz kekildi?

Ekeýmizde ne aıyrma? Eki qol men eki aıaqqa – jalǵyz bas, tánimizdi oıyn, janymyzdy oı sorǵan, Ózimiz de bilmeımiz: qaısysy –murat, qaısysy – arman. Tek qıal bar – qumaı shalǵyzbas; kúdik bar – túlki alǵyzbas; Sosyn, sosyn ózgermeıtin túsinik bar kóni qatqan terideı.

Áı, túbi bar ǵoı, emeksitken sol qıal qum shekerdeı erimeı; elegzitken sol kúdikten jerimeı; túsinikter kúıremeı, kóni qatqan terideı – sirá de el bolmaspyz!..

Talǵat ESHENULY.

(Facebook-tegi paraqshasynan)