(Suraq: Siz kóripkelge senesiz be?)
«Jolymdy ashtyraıynshy» degen oımen, ataǵy aspandap, aıǵa ilinip qalǵan kóripkel áıelge bardym. Kezegim kelgen soń kirdim. Kóripkel qolymnyń tamyryn ustap turyp: –Siz «toshno» erkek ekensiz... –dedi. Qýanyp kettim. Qalaı bilip qoıdy deseńizshi? Men erkek ekenmin ǵoı! Eı, jarandar, maǵan qarańdar, men... Men erkekpin! –Siz áıel emessiz... –dedi ol taǵy da. –Shynymen áıel emespin ǵoı? Qalaı bilip qoıdyńyz? Kóripkeldigińiz keremet eken! –Maǵan árýaqtar SMS–pen hat jiberip jatyr... –Rahmet sizge apaı! –Kindigińiz bireý ǵana... –Qalaı bilgish edińiz! Ǵajap! –dep tańqaldym! Kóılegimniń syrtynan qarap otyryp–aq, qalaı bilip qoıdy deseńizshi! Mundaı kóripkeldi birinshi kórýim! Qol soǵyp qoıyńyzdar, myrzalar! Meniń kindigim bireý ǵana eken! –Siz... Siz áke–shesheńizden týylǵansyz... –«Inkýbator» emespin ǵoı? –dep suradym men. –Ákeńiz emes, shesheńiz týǵan sizdi... –Ǵajap! Men muny bilmeı júr edim... –Siz adamsyz... –Ia, ıa, adam emes haıýýandar kóp qoı! Reseı bandıtteri ýkraın sarbazdarynyń bastaryn kesip, «posylkamen» áke-sheshelerine jiberip jatyr deıdi... Bul soǵys– qanisherlik, basqynshylyq soǵys boldy ǵoı... –Siz úılengensiz. –Keshirińiz, úılengen joq edim... Qyryqqa kelip, úılený esimnen shyǵyp ketipti... –Dep aıtsam, shynymen senip qalmańyz... –Jolymdy ashyp berseńiz... –Jolyńyz jabyq eken. Qazir siz júretin kósheni gaz mekemesi qazyp tastaǵan. Olar joldy japqan soń, sý mekemesi qazyp tastaıdy... –Joǵa, ómirde jolym bolmaı júr degenim ǵoı... –Ómirde de trotýarmen júrińiz. –Jumysqa turamyn ba? Qaı jerge barsam da, aqsha suraıdy... –Jumyssyzsyz ba? –Ia. Jumyssyzbyn... –Munyń ózi jaqsy mamandyq... Jumyssyz júrýdiń ózi– jumys... –Bir basym qashan ekeý bolady eken? –Eki basty adamdardy sıam egizderi deıdi... Siz ólgenshe osy sý mı basyńyzben júresiz... –Pesheneme ne jazylǵan? –Óleń jazylypty... Muqaǵalı Maqataevtyń «Alpystan asyp baramyn» degen óleńi... –«Otyzdan asyp baramyn» degen sıaqty edi... –Ol adam osy ýaqytqa deıin alpystan asyp, qaqpas bolǵan shyǵar? –Apaı, qansha jyl ómir súredi ekenmin? –Áıteýir bir kúni ólesiz... Kóripkeldiń keremetine tań qalyp, alaqanyna myń teńge alpys tıyn ustatyp, úıinen qýanyp shyqtym. Keńkelesterdeı kerilip tur edim, atańa nálet dese, iship alǵan ba deımin, bir polıseıdyń mashınasy quıyndatyp keldi de, qaǵyp ketti! «Áıteýir bir kúni ólesiz...» dep qalaı bilip aıtqan edi deseńizshi! Al meniń ólgim kelmeıdi, myrzalar...
(Avtordyń Facebook-tegi paraqshasynan)
