Bas prokýratýradaǵylar ekstremıstik áreketpen shuǵyldanýshy kez kelgen adam Qazaqstan zańy aldynda jaýap beretinin, tipti Qazaqstanǵa qatysty sheteldik saıasatker osyndaı is júrgizse de jazalanatynyn málimdedi - dep habarlaıdy Tengrinews.kz.
Joǵary palata komıtetine ekstremızm men lańkestikke qarsy is-qımylǵa qatysty zań jobasyn tanystyrǵan Bas prokýrordyń orynbasary Andreı Kravchenkoǵa: "Zań jobasynda Qazaqstannyń egemendigine, terıtorıasyna nuqsan keltirip kópshilik aldynda sóıleıtinderge qatysty da pýnkt bar. Bul Jırınovskıı myrzaǵa jáne ınternette júrgen basqalarǵa da, saıasatkerlerge de qatysty ma? Iaǵnı, bul bizdiń elimizdiń egemendigine kúmán uıalatýǵa umtylýshy is-qımyldar. Bul tizimge osy masshtabtaǵy saıasatkerler iline me?" - dep suraq qoıǵan Senat depýtaty Birǵanym Áıtimova. Oǵan jaýap retinde: "Bul arada ol usaq kásipker bola ma, álde muǵalim nemese joǵary dárejeli saıasatker bola ma, eshqandaı aıyrmasy joq. Ekstremıstik is-qımyl jasaǵandar, ekstremızmge shaqyrýshylar basqa eldiń joǵary dárejeli saıasatkeri bola ma, báribir, biz olarǵa Qazaqstan zańnamasy qarastyrǵan sharany qoldanamyz. Zań aldynda bári birdeı" - dedi Kravchenko.
"17-bapta Qazaqstan Respýblıkasyna qarsy áreket etetin, kópshilik aldynda el egemendigine selkeý túsirip, málimdeme jasaıtyn sheteldik nemese azamattyǵy joq tulǵalardy Qazaqstan Respýblıkasyna kirgizbeý týraly aıtylady. Men ondaı saıasatkerlerge óziniń jymysqy áreketin júzege asyrý úshin bizdiń elge kelýiniń qajeti joq dep oılaımyn, olar ony BAQ arqyly jasaı beredi, sóıtip ondaı aqparat árbir shańyraqqa, árbir otbasyna jetip jatady" - dedi Adyrbekovte óz kezeginde. Ol usynylǵan ózgerister ishinde taǵy bir bap baryn basa aıtty. Onda ekstremızmdi BAQ arqyly taratýǵa sottyń sheshimimen tyıym salynady, ondaı buqaralyq aqparat quralynyń qyzmeti doǵarylady delingen. "Nege elimizdiń bútindigine, egemendigine nuqsan keltiretin sol saıasatkerlerdiń sózin taratýshy BAQ-tarǵa qarsy shara qoldanylmaıdy?" - dep suraq qoıdy Adyrbekov. "Eń aldymen, Úkimet, quqyqqorǵaý organdary mundaı tulǵalarǵa Qazaqstan atynan resmı málimdemesi úshin narazylyq bildiredi. Olar shetelde turady. Sheteldiń azamaty bolǵandyqtan, QR quqyqqorǵaý organdarynyń quryǵyna ilinbeıdi, biraq BAQ arqyly málimdemeleri shynymen de tez taraıdy. Alaıda elimizde jumys istep jatqan reseılik telearnalardyń teń jartysy memlekettik quzyrly organdarda tirkelmegen. Sondyqtan esepke alynbaǵan sheteldik telearnalardyń habar taratýyn osyǵan baılanysty toqtatýǵa ábden bolady" - dedi Kravchenko.
Qamshy-aqparat
