Almatyda «Jastar ­jemqorlyqtan tys ýnıversıtetterdi qoldaıdy!» atty sybaılas jemqorlyqqa qarsy alǵashqy stýdentter forýmy ótti dep habarlaıdy Qamshy AA QazUÝ Baspasóz qyzmetine silteme jasaı otyryp. Sharaǵa qaladaǵy 38 joǵary oqý ornynyń stýdentteri men jastar uıymdarynyń ókilderi qatysty. Forým ál-Farabı atyndaǵy QazUÝ-dyń jetekshiligimen  Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi men  Almaty qalasy ákimdiginiń jastar saıasaty máseleleri jónindegi basqarmasymen birge uıymdastyryldy.

Shara qatysýshylary stýdent jastardy jemqorlyqqa birigip qarsy shyǵýǵa, akademıalyq shynshyldyq qaǵıdasyn ustanýǵa jáne áleýmettik zulymdyq – jemqorlyqqa qarsy kúres jumysyna ózindik úles qosýǵa shaqyrdy.

Stýdent jastar jemqorlyqqa qarsy jumystaǵy tájirıbelerimen, jobalarymen jáne bastamalarymen kreatıvti túrde bólisip, ózara ıdeıa almasty, oı-pikirleri men usynystaryn bildirdi.  Qazaqstandyq estrada juldyzdary jarqyn ónerlerimen jastardy qoldap,  Stýdentter saraıynyń sahnasynda jastarmen birge «Jemqorlyqqa jol joq!» dep urandady.

Forým barysynda QazUÝ stýdentteri «Jastar – jemqorlyqtan tys ýnıversıtetterdi qoldaıdy!» qozǵalysyn bastap berdi. Olar jemqorlyqqa qarsy forým estafetasyn Almaty qalasy men respýblıkanyń 38 oqý ornyna saltanatty túrde tabystady. Jastar uıymdary komıtetiniń tóraıymy Aısulý Ernıazova jemqorlyqqa qarsy forým qatysýshylarynyń úndeýin oqyp, stýdent jastardyń azamattyq ustanymy men olardyń jemqorlyqqa qarsy kúrestegi uranyn jetkizdi.

 «Biz óz bolashaǵymyzdy Zań ústemdik etken qoǵammen baılanystyramyz. Parasattylyq, eńbekqorlyq pen aqyl, talant pen iskerlik qasıetteri jastardyń kemel keleshegine,  syı-qurmet pen baqýatty ómirge jol ashady. Birlesip biz jemqorlyqsyz ádiletti qoǵam ­– Máńgilik El qura alamyz», – dep QazUÝ magıstranty Aısulý Ernıazova forým jumysyn tujyrymdady.

 «Joǵary oqý oryndaryndaǵy jemqorlyqpen kúres eldiń ulttyq qaýipsizdigin qamtamasyz etýde mańyzdy basymdyqqa ıe jáne onda stýdent jastardyń alar orny erekshe. Biz sizderdiń bul bastamalaryńyzdy quptaımyz jáne sizdermen birge jemqorlyqtan tys ýnıversıtetterdi qoldaýǵa keldik. Jemqorlyqsyz memleket sizderdiń árqaısylaryńyzdan bastalady. Bolashaq jastardyń qolynda!» – dep QazUÝ prorektory Sholpan Jamanbalaeva forým qatysýshylaryna úndeý tastady.

QazUÝ belsendileri jınalǵandarǵa «Ýnıversıtet jemqorlyqtan tys» jobasynyń júzege asyrylýy jaıly baıandap berdi. Oqý ornynda jemqorlyqqa qarsy mehanızmder men tehnologıalardyń birtutas jıyntyǵy engizilip, kez kelgen jemqorlyq áreketine shydamsyzdyq tanytatyn orta qurylǵan.

Ýnıversıtette joǵary etıkalyq talaptar men tártip standarttarynan turatyn Oqytýshylar men qyzmetkerlerdiń Korporatıvti mádenıet kodeksi, Stýdentterdiń ar-namys kodeksi engizilgen. Jemqorlyqqa qarsy saıasatty ýnıversıtette únemi jetildirip otyrýǵa «keri baılanys» arnalary kómegin tıgizýde. Áleýmettik seriktestik negizinde basqarý sheshimderin qabyldaý úderisine stýdentterdi kóptep tartýǵa úlken mán beriledi. «Keremet» stýdentterge qyzmet kórsetý biregeı ortalyǵynyń ashylýy «ýnıversıtet-stýdent» ózara árekettesýindegi búrokratıalyq kedergilerdi  joıýǵa múmkindik berdi. Munda «bir tereze» qaǵıdasy boıynsha stýdentterge 500-den astam ákimshilik, bilim berý, medısınalyq, áleýmettik-turmystyq jáne keńes berý qyzmetteri kórsetiledi.