Jergilikti ákimdikter Astanadan kelgen qonaqtardyń kóńilinen shyǵýǵa barynsha tyrysady. Mundaı pikirdi QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva bildirdi, dep habarlaıdy QazAqparat.

«Biz jeńildik sharttarymen baspana bólýdi, jaldaý qunyn mindetti túrde óteýdi, zeınet jasyndaǵy memlekettik qyzmetshilerge jeńildikter usynýdy, balalaryn kezekten tys balabaqshaǵa ornalastyrýdy usynamyz. Memlekettik organdardy qamtamasyz etýge arnalǵan shyǵystar quramynda ókildiktik shyǵyndardy qarastyrý kerek. Ortalyq, oblystyq, aýdandyq taraptan  kez kelgen tekserýshilerdi mindetti túrde kútip alyp, qandaı da bir syılyq berip jatady. Munyń bárin joıý úshin ókildiktik shyǵyndardy qarastyrǵan jón», - dedi atalǵan komıtette ótken «QR-da sybaılas jemqorlyqqa qarsy is-qımyl máseleleri boıynsha zańnamany jetildirý» taqyrybyndaǵy dóńgelek ústel barysynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev.

Osy rette Darıǵa Nazarbaeva ókildiktik shyǵyndardy qatań reglamentteý kerektigin basa aıtty.

«Bul prosedýrany nemese óńirge saparmen kelgenderdi qabyldaý tártibin qatań reglamentteý qajet. Bul jerde de qatań tártiptiń bolǵany jón. Ákimdikter Astanadan kelgen qonaqtardyń kóńilin tabýǵa baryn salyp jatady», - dedi Nazarbaeva.

Alık Shpekbaevtyń aıtýynsha, óńirlerge issaparmen barǵandardyń para alý derekteri jıi kezdesetindigin atap ótti.

«Qarjy mınıstrliginen Qaraǵandy oblysyna tekserispen barypty. Aqsha qarajattaryn alǵandarymen qoımaı sýpermarketterdiń birine kirgen olar bastan-aıaq kıinipti. Aqyr aıaǵy ustalyp, 10 jylǵa bas bostandyqtarynan aıyryldy», - dedi ol.

Darıǵa Nazarbaeva agenttik  tóraǵasynyń orynbasarynan atalǵan qyzmetkerlerdiń jemqorlyqqa qarsy saıasat máselelerin bilmegendigin sondaı qadamǵa barǵan shyǵar dep surady.

«Menińshe, búgingi kúni basshylar jemqorlyqqa qarsy saıasatty, zańdarymyzdy biledi. Biz barlyq derlik memlekettik organdarda túsindirý jumystaryn júrgizip, ádep normalaryn buzý saldary beınelengen vıdeolar kórsettik. Qalaı desek te tómende bar psıhologıa ózgerip keledi. Biraq, menińshe bir jyldyń ishinde ózgere qoımaıdy. Oǵan ýaqyt kerek», - dedi Shpekbaev.