«Qostanaı tańy» gazetinde aqyn Saıat Ábenovtyń «Bizdiń ákim» atty óleńine qatysty el aqsaqaldary men elge tanylǵan apa-atalardyń synı pikiri jarıalandy. Onda Qostanaı oblysynyń ákimi Arhımed Muhambetov bolǵaly oryn alǵan oń ózgeristerdi tizbektep jazǵan. Saıat Ábenovtiń qolyna qalam alýyna sebep bolǵan sý tasqyny, qazaq halqynyń basyna týǵan náýbet ákimderdiń bet-bedeline qaramaıdy dep jazǵan maqalada.
"Aınalaıyn, Saıat! Aq pen qarany, ótirik pen shyndyqty, jaqsy men jamandy aıyratyn jasqa jetken azamatsyń. Seniń talabyńa tilekshimiz, óshkenińdi emes, óskenińdi qalaımyz. Arzan sózge, jalǵan ataqqa qumartpaǵanyń abzal. Syrtta júrip, uzynqulatan jetken jel sózderge erip, eldiń azamattaryna aıyp taǵýyń orynsyz. Apat aıtyp kelmeıdi. Bul qazaq dalasyna kelgen bul náýbet ákimderdiń bet-bedeline qaramaıtyndyǵyn balamyz biler deımiz" dep jazady "Qostanaı tańy" gazetiniń Bas redaktory.
Saıat Ábenovke qaratyla aıtylǵan syndarǵa qatysty aqynnyń pikirin bilý úshin ózine habarlastyq. Saıat Ábenov Qazaqstannyń azamaty retinde tek óz oıyn bildirgenin aıtady.
Saıat Ábenov, aqyn: Bala kezimnen bastap «Qostanaı tańy» gazetinde óleńderim shyǵyp turdy. Atalmysh gazette jazylǵan syndy ustazdarymnyń aqyly retinde qabyldaımyn. Aǵalarym men apalarym óleńdi suıyltpaı, kórkemdep, móldiretip jazsań degen keńesin aıtyp otyr. Muny ózime kelip, Saıat, sen shekten shyǵyp barasyń. Munyń bolmaıdy dep aıtsa qýanar edim. Gazet betinde maqala jarıalanǵany men úshin aýyr soqqy boldy. Men Qazaqstan Respýblıkasynyń azamaty retinde eldegi másele jóninde tek óz azamattyq pikirimdi bildirdim. Odan poezıa izdeý kúlkili. Onda ákimniń jeke basyna tıispedim. Biri óziniń azamattyq pikirin sózben aıtsa, men óleńmen jetkizemin. Kezinde Buqar jyraý da Abylaı hanǵa synı pikirlerin óleńmen jetkizgen. Abylaı han ony durys qabyldaǵan. Sol sıaqty ákimder de jergilikti aqyndardyń oıymen sanasý kerek, pikirine qulaq asý kerek dep oılaımyn. Sebebi men tek halyqtyń kókeıindegisin ǵana jetkizdim. Men halyqpen birgemin. Al ózimdi torǵaılyq aqyn dep tanystyrýyma keler bolsaq, stýdent kezimnen barlyq óleńderimniń astyna torǵaılyq aqyn dep jazyp daǵdylanyp ketkenmin. Mundaǵy aıtpaǵym tek týǵan jerim Torǵaıdiki ekenimdi bildirý ǵana. Áleýmettik jelide jarıalanǵan jazbalarym óz aýdıtorıama arnalǵan. Unap jatsa qýanyshtymyn, unamasa renjimeımin.
Men aıtylǵan syndardyń barlyǵyn saralap, saraptap, bir júıege keltirip, qorytyndy shyǵaramyn. Bolashaqta múlde óleń jazbaımyn nemese poezıaǵa kóshemin» deıdi Saıat Ábenov.
Aqyn, jazýshy – zıaly qaýym ókilderi. Eldegi qordalanǵan máseleni kóterip, jyrlaıtyn da, halyqtyń muńyn muńdaıtyn da, joǵyn joqtaıtyn da osy zıaly qaýym. Eldegi ózekti ári mańyzdy másele týrasynda únsiz qalý halyqtyń shymbaıyna tıetini anyq. Aqyndardyń halyqtyń kókeıindegisin óleńmen jetkizse quba-qup deımiz. Oryndy syn aıtylsa min de túzeletini anyq. Tek ony durys qabyldap, oń nátıje shyǵarsa bolǵany.
Qamshyger: Ásem Álmuhanbet
